早前，見到連登有post討論職場嘅友誼，搞到我都想分享一吓。維持或者建立關係，我覺得分4個因素：睇你花幾多時間培養關係有冇透露自己嘅事你工作嘅狀態有冇利益衝突你要同同事關係好，一齊食飯係其中一個方法。我見啲同事一齊有講有笑出去食飯，食完又一齊返公司。我本人同同事關係都幾好，見到得意新聞會一齊講吓笑吓，但你話深交或者約出街，就好少。我一入職都試過出去同同事一齊食，但得1個鐘食飯，我又食得慢，所以我食得超趕，完全係倒啲食物入肚。最後，我決定都係自己帶飯算。為咗用自己嘅速度食飯而放棄同同事一齊食飯。不過我都會間唔中一齊食吓飯。如果唔係好容易變孤獨精。同同事閒談個陣，都睇你會唔會透露自己嘅事俾同事知。我之前識得一個同事，佢超級奇怪。佢除咗唔透露自己嘅事，仲連每一份工都用唔同英文名。佢話因為唔想俾人知道佢之前嘅事，所以去唔同環境就有唔同嘅名，等人唔能夠connect到佢嘅資訊，好地地文職搞到好似間諜咁樣。但因為佢嘅處理人際關係嘅方法，令人好難相信佢，關係自然好難建立。我覺得職場嘅友誼仲睇你工作嘅狀態。如果你係好多甩漏要人幫手執手尾，咁你就算再花時間想搞好關係，都好難令人想同你做朋友。就好似冇人想同淨係識擦鞋嘅人friend咁。利益衝突都係好重要，可能前一秒好friend，下一秒你地一係競爭對手就即刻係背後互講壞話。我都見過類似情況，仲要兩人都單獨同我講對方壞話，但表面上大家仲笑住一齊食飯。不過職埸究竟有冇真友誼，都好睇對方嘅為人。要大家性格適合，有共同價值觀先可以做到朋友。如果性格唔適合，又冇共同價值觀，其實冇乜必要做朋友，因為你同佢都唔會有咩好傾，一傾到緊要野又各執唔同意見。所以，原來最後一切都唔重要，係睇你有冇運氣或緣份，可以係同一時間係同一公司遇到同你性格適合有共同價值觀嘅人。
