上個星期放假同班同事去左大喜慶到食飯，的野唔錯波。我地四個人叫左四個小菜一齊分，仲要送埋甜品，超抵。不過最好食都係佢個士多啤梨骨，脆卜卜又甜甜地，超好味呀。連我地呢幾個怕肥既女仔都全部食清光，連汁都撈埋，下次一定要再去過。 而我個同事叫左味香煎咸魚，本來對呢味菜冇咩好感但係出乎意料之外，唔單只外表金黃，而且仲好乾身添。的咸魚香味十足，但一的都唔油膩。少少都可以送到一碗飯呀，我同事果然識食。另外一個我由細到大都咁中意既菜就係鼓油雞翼啦，唔單只有細個既回憶，仲係大人細路都啱。不過佢地的雞翼有少少甜味，所以入味得黎又唔會太咸波，而且色澤均勻，又靚又好味，最緊要係新鮮，一的雪味都冇，果然係一絕。之後仲叫多左個姜蔥蝦籽燜面，好普通既面，但係估唔到又有驚喜，的面好重蝦子味，而且口感又爽又彈性十足，姜蔥又配搭得好波，遠遠地聞到陣陣既香味呀。佢地仲好周到咁比的麻油我地，可以隨意加。我加左少少黎拌面，簡單又好味。 仲有一味就係口水肥牛，的肥牛唔只係嫩滑，仲麻中帶辣，味道好有層次感呀，同平時食開個的只係一味得個辣個的好唔同。睇佢的汁我好肯定一定係用四川既子天椒先整到既特級味道呀，食完成身出哂汗，爽呀！
