夏天熱辣辣 但又想去郊外吸收下新鮮空氣同時影攝靚相？ 流曬汗仲點影靚相呀😞 呢條路線就岩曬你！可以話係老少咸宜呀！拍拖又好，一家大細又好，絕對輕鬆。 港島其中一條出名靚景易行嘅山 - - 南朗山！ 佢位於港島南區黃竹坑，海拔284米。 最方便去嘅方法當然係搭港鐵南港島線係黃竹坑站落車，B出口出，過天橋去對面地下落，跟住會經過南朗山熟食中心，再一路沿住南朗山道一直行，中途會見到新加坡國際學校同加拿大國際學校，沿住呢條路就岩！ 一路行都係油柏路，步行大約十分鐘，左邊會有一條南朗山徑。一路上都係梯級，而且上斜幅度不大，慢慢行同時欣賞下風景，感受下大自然。 我會將呢條徑分四個打卡點~ 行到路程嘅三分一，會見到左邊突然較開揚嘅景色 - - 布廠灣。一艘艘遊艇漁船停泊在灣內，正好在玉桂山嘅後方，令我們回想起早在一年前走過的路徑 [玉桂山與鴨脷排．連島沙洲]。見議大家走完全程再翻嚟打卡，有機會影到日落同雲打造嘅耶蘇光！ 再嚟 行到路程嘅一半會見到南朗亭，咁曬咁熱當然要係度食下野休息下。但吾好忘記望下後面個海景呀！180度嘅海景仲附送部分海洋公園嘅景色，間中仲聽到啲人玩機動遊戲嘅尖叫聲，好過隱。 再上多少少樓梯就到左最開揚嘅位 - - 直升機坪！呢個位可以睇到270度無敵海景，左邊望到淺水灣、深水灣，中間有大家由細玩到大嘅海洋公園，右邊就係玉桂山及鴨脷排，仲睇到遠處嘅南丫島！吾少人因為呢個位置開揚 景觀優美，都會帶航拍拍攝，不過記憶中 直升機坪好似係吾可以放航拍，而且海洋公園屬於私人地方，大家要留意啦。 行上多一條樓梯到山頂位會係一個發射站，係呢個位望翻落去係真正嘅一覽無遺，仲可以清楚睇到纜車在兩邊穿梭。 又易行 又近市區 景色又咁靚，無藉口吾出嚟行啦！
