如何分辨是M 到還是真的懷孕了?「直接驗孕咪得囉!」但就係好邪,好多媽媽們都唔敢太早驗孕,其實有冇蛛絲馬跡,可以早喺M 到前有跡可尋?我嘅第二胎,比第一胎更來得不易,足足期待又失望又期待地過了10個月,夠運的話寶寶都出世喇。原本以為已經有第一胎經驗,但說到底,緣份是需要機遇需要等待的。好多人抱著順其自然嘅心情去等待緣份,但應該有媽媽同我一樣,喺日有所思嘅情況下,即使唔敢太大期望、唔敢提早驗孕,但仍然不停留意身體會否出現一d早孕反應,亦會不停上網睇早孕反應資料。同第一胎一樣,我嘅早孕反應並不明顯,只係當知道真係中獎時,回想起來先覺得「原來身體比咗Signal 我」。但老實講,早孕反應跟經期來潮前的反應是非常相似的。谷M 不適感差不多到經期日子,心情開始緊張,好怕去洗手間,每次除褲見到冇血,心諗「頂住呀,唔好黎!」萬一失敗,又要重新努力了,單純想像已經覺得辛苦。原定經期前2日,下腹有點漲痛,開始有谷M 不適,似係將要排洪嘅感覺。同第一胎一樣,即使一直冇黎M,谷M 感覺到9週仍然間歇地出現。所以只單純有谷M 不適,完全唔能夠判斷已成功造人。乳房漲痛,乳腺疼痛經期前一星期左右,乳房有漲痛感,同M 到前好似不過唔算好明顯,反而係周邊乳腺明顯比較痛,痛得你會覺得有點點異常,而乳腺疼痛亦會伴隨著你整個孕期。雖然第一胎時衣個問題唔嚴重,但今胎喺第7~8週時,我已經痛到以為自己身體有異常問題,尤其係瞓覺,平瞓一段時間後轉到側睡時,乳腺勁痛好似條筋好耐冇拉果陣拉扯撕裂感。非常疲累原定M 到日子前1~2日,個人開始有疲態,果種攰係好似作病咁個人無咩精神,雙眼有點澀,然後就係攰到啱啱瞓醒無耐,2個鐘後又再眼瞓。最明顯係中午又會好想好想瞓覺,做咩都提唔起勁,集中唔到精神,然後明明平時夜晚11~12點先瞓,衣家10點零就想瞓落床咩都唔理,電話都唔想玩。雖然M 到都會攰,但懷孕嘅攰應該係有明顯分別的。分泌增多M 到前亦會分泌增多,但通常係M 到前1星期就會開始,但懷孕早期嘅分泌大慨接近原定M 到日子先開始多,亦會一直持續。作嘔悶焗感第一胎時,接近第8週已經開始作嘔,當時衣個感覺好突然,又好奇怪。會對某d 食物產生厭惡感,想反胃。平時鐘意食肉,但變得完全唔想;見到有人跌咗個軟雪糕喺地下竟然會想嘔;最搞笑係之前法國買咗舊好出名嘅香梘,因為好香放咗喺書櫃門,點知自從有咗,就再無打開過櫃門,因為一開就想嘔,情況差到要將舊梘送去娘家,點知下轉返娘家,一入門就聞到衣陣味又想嘔。開頭作嘔只係作嘔,衣個狀態維持咗2個星期,但自從有一次真係嘔出黎之後,我再冇好好食野,口味變咗好多,有d 食物要入咗口先知會嘔,有d 一望就想嘔,亦有特別想食嘅嘢食完都會嘔。就咁樣...持續了3個月。來到第二胎,作嘔感覺亦好快出現,不過仍未試過真係嘔出黎,而令我作嘔嘅嘢都冇之前咁多咁誇張,主要係胃口較差,容易胃漲,有時條脷會有陣苦澀。希望捱到12週就可以正常返啦!~胃漲易肚餓大慨6~7週,開始容易肚餓,Lunch 後2個鐘,個胃就囉囉攣,但食少少嘢又會肚漲,唔食又唔得。果種肚餓感係忍受唔到,要即刻就食嘢好似餓咗好耐嘅感覺。然後食完小食隔2個鐘又再想食嘢...所以孕期都真係建議少食多餐。屁股骨痛呀,唔知點解,醫生話第二胎陀得較辛苦,雖然係視乎個人體質,但我應該係辛苦命果一群...第一胎時,差不多到中後期先開始有屁股神經痛嘅問題,但今胎早喺8週已經出現。其實我唔知衣種痛咩名堂,只可以形容比大家知...左邊屁股中間上少少近坐骨位置痛,當我重心喺右腳,然後想提起左腳時會痛;當我放直雙腳坐地下,上身微微向後靠時會痛;彎身喺洗手盆洗完面企返直時會痛;沖完涼彎腰提起右腳著內褲時會痛;半夜起身屙夜尿時會痛;有時行行吓路都會痛...以前我以為個肚越來越大,壓到神經導致,但我今胎一開始就黎料,所以我估佢唔到,唯有下次產檢問問醫生...可能第二胎關係,個肚皮一早就鬆哂,肚皮比第一胎大得快,第一胎6個月時仍然輕鬆暢遊沖繩,少少肚唔明顯,但現在才8週已經感到褲頭有點緊,連本身有鬆嘅褲都係勉強先扣到鈕。枉我之前仲買咗好多褲...不過點辛苦都好,衣個Moment 期待咗好耐,所以一定要學識享受佢,而且孕期不適反應亦印證著小baby 喺肚裡成長著,就當係你感受到胎動前同bb 嘅早期溝通吧~第一胎沒有經驗唔緊要,黎到第二胎我會定期更新懷孕進度,無論你係第一胎新手媽媽定係同我一樣已經係有經驗嘅準媽媽,都歡迎交流資訊,一齊迎接小寶寶來臨❤️加油啊媽媽們!