今個元宵節，你地過成點ar?係咪又係同家人做節食湯圓再唔係去維園睇花燈呢?今年我就特別D，陪左阿爺阿嫲番左鄉下普寧，聽講果度每年十五都有巡遊，活動比其他節日更盛大。咁我就當然想去睇下la!! 我阿爺阿嫲為人好傳統，每逢節日，我阿爺都一定會係正日做節。就除左元宵節。此外，阿爺阿嫲平時去旅行都唔上心，上次阿嫲先唔記得帶回鄉證。但今次唔止帶齊野，仲剪埋個髮先去。 去普寧的路唔容易，我地朝早7點半要係九龍塘搭旅遊車，搭足6小時先到普寧。其間我仲要同我叔叔坐，2個肥佬坐埋一齊仲邊有位!?我咪唯有側身坐，坐到背脊痠晒。其實都可以搭高鐵既，只係訂票果陣要拎晒所有人的回鄉證，我老豆怕麻煩，最後冇訂。無法la!回程果程唯有辛苦多一次。 一落車就下午la!!落車之後我地就同普寧的「阿直」會合。所謂的「阿直」，其實即係阿叔的潮州話音譯。 「阿直」份人好好客，一知道我地未搵到地方住，就借佢的新居俾我地住2日，自己竟然住舊居!!!我話你知，將最好的借給別人，我一世都做唔到咁。我老豆都覺得唔好意思。 香港人食飯爭俾錢就見得多，我見怪不怪。但我呢3日裡面，我見「阿直」爭俾錢的技倆真係令我目瞪口呆。一係就未點菜就先俾錢，一係就叫老闆唔准收我地錢，冇錯主場之利係重要，但見人地爭俾錢唔係枱面上的爭鬥，而係暗地裡的鋪排，可見我老豆同我阿叔今次係完敗。 今次我番鄉下前，同事叫我幫佢地買潮州糖番去。但我整個旅程又冇逛商店的機會，眼見「阿直」家裡有潮州糖，就問「阿直」邊度有得買?「阿直」只係答專門店有，就唔詳細講。果刻我已經心知不妙。 「老豆，我係咪出事la?」 「好似係.....」 果然，第2日，我見到「阿直」拎左幾十盒潮州糖上黎，冇錯，係幾十盒，有我半條小腿咁高....... 「點算ar老豆!?」 「你同我點都掂一半去......」 我當下拎左十幾盒，其他就阿爺阿嫲阿叔包辦，「阿直」仲提醒我地要半個月食晒.... 「老豆，我真係估唔到咁大件事ga!!!」 「你今次好大件事咩?」 「你唔係都.....」 「你『阿直』上次請我食一粒油甘子，知唔知咩係油甘子ar??細細粒好酸有D苦果D ar!我食完佢問我好唔好食?我禮貌上當然話好食la!!結果佢第2日就買左7斤俾我食la!!」 「......」我地真係2父子......
