隨住唔同航空公司開設航班去柬埔寨，有更多香港人去柬埔寨旅遊。喺參觀吳哥、洞里薩湖、監獄博物館、皇宮嘅同時，其實仲可以出少少力去幫助呢個貧窮嘅國家。 點擊圖片放大 根據報導柬埔寨係亞洲排名第二嘅貧窮國家(第一位為尼泊爾)，呢度約有34%的人口在貧困中掙扎，僅靠每天1美元(約$7.7港幣)生活。經濟以農業為主，工業基礎薄弱，亦係世界上最不發達國家之一。 點擊圖片放大 +3 除咗喺香港捐錢、捐物資、參與志願機構到當地起屋起學校、義教等等外，今次呢篇blog主要會share下出發當地旅遊期間，利用剩餘行李嘅空間或時間去幫助呢個地方，如果有錯誤或更專業嘅方法，歡迎提供資料。 首先喺遊覽期間，一定會有兒童用唔同語言講candy、one dollar希望索取現金或者糖果、餅乾等。由於當天缺乏衛生教育，部分兒童連基本刷牙知識都冇，所以好多小朋友因為長期食大量糖果而導致蛀牙，所以糖果真係盡量唔好俾佢哋。 至於金錢，柬埔寨官方亦出咗遊客指引禁止遊客施捨金錢或糖果，原因係持續呢種行為係鼓勵佢哋唔返學，繼續乞討。 但每次到訪景點總會唔忍心望住一班天真小朋友嘅面孔，網上有唔少機構都鼓勵大眾轉贈文具或者舊衣。 每次俾文具/故事書/圖畫書/英文卡/日用品佢哋，佢哋已經好開心。但亦有須要注意地方： 1)由於缺乏固定平坦書桌，要盡量送贈傳統鉛筆而非鉛心筆，亦緊記須要連埋鉛筆刨送俾佢哋； 2)送畫筆同時亦可以送小畫冊； 3)視乎兒童人數，避免得一份，順得哥情失嫂意，而且逐個派俾佢哋較好，因為見過因為爭禮物而打交； 4)有時間仲可以簡單教佢哋文具用途； 5)日用品以健康為主，如牙刷牙膏(記得有效期要超過半年) 至於衣服方面，喺柬埔寨其實經常會見到香港馬拉松唔同比賽嘅衫，但亦都見過有小朋友著深色長袖毛毛衫，仲要成頭都係汗。請留意柬埔寨全年平均20幾至36度，所以盡量唔好送贈厚衣、深色衫或透氣度低等嘅衫呀。 喺網上搵到部分有定期接收物資嘅機構，如有咁岩出發，又有適合物資可以捐住當地，建議提早聯絡機構，查詢下接收意願同安排。 https://www.facebook.com/AngkorWall https://www.facebook.com/welovelightlove https://www.facebook.com/BuddingHope/ https://www.facebook.com/Bridges-Cambodia-International-276972608546/ 另外喺香港亦有機構收集物資：https://www.facebook.com/bookstocambodia/ 更專業分析：請勿再去孤兒院派糖http://www.thestandnews.com/personal/%E8%AB%8B%E5%8B%BF%E5%86%8D%E5%8E%BB%E5%AD%A4%E5%85%92%E9%99%A2%E6%B4%BE%E7%B3%96/#.Wavo_GtG-Vw.email 以上資料只供參考，純粹提供一個機會喺旅行期間都可以做多一步，都係o個句，如有其他資料，歡迎提供！
