用得「進擊」呢兩個字,就知道唔簡單啦! 被列入世界文化遺產嘅白川鄉,童話世界一樣嘅合掌屋,唔少人都話一生人要去一次。由於白川鄉點燈,一年會舉行7日,上網搵完一大輪資料同分享,有人會話: 1)點都要去一次 2)除非喺白川留宿,否則只有自駕遊先睇到點燈,但民宿大約預早半年先book到 3)近幾年人多到嘔,揀平日去先體驗到白川嘅寧靜 呢個點燈旅程,由一張hkexpress免費機票開始,諗住兩個月前決定起程日本應該冇咩難道,可惜... 民宿已經full曬,姐係冇可能住喺白川,一定要點燈後去其他地方留宿,而且點燈只限指定日子嘅18:00-19:30,要睇點燈有以下方法: 1)自駕遊(今次一丁友又大雪唔敢) 2)join 點燈local tour(價錢貴而且網上話行程幾趕) 3)預訂巴士飛: 大部分點燈日子嘅尾班車都睇唔切點燈,今年唯獨有3日嘅兩班車係點燈後開出。 第一班要點燈前兩個月日本時間早上打電話訂飛(有如訂演唱會飛一樣,不停喪打,打通仲要單字英文交談,講完一輪佢答單字"full") 第二班一樣晨早喺網頁填一大埋日文,㩒曬所有process都係彈出「選択区間の空席数:0」姐係都係full。 攪咗咁多嘢都攪唔掂,已經放棄點燈行程。點知出發前半個月,多手㩒入去訂車飛網頁,突然有一張男性嘅車飛彈出,(據說填性別係因為唔會將異性安排同坐),諗都冇諗就訂咗,同時改曬成個行程同住宿。 出發日:2月6日(高山->白川->點燈->高山) 12:50->1340 一落車已經係暴風雪 喺大雪情況下剷入三小屋先影相。再慢慢行返出嚟。 點擊圖片放大 +4 14:30-15:30第一次排隊: 點燈有兩個觀賞方法,一係喺地面睇,二係上展望台(即觀景台)。要上展望台必須取得呢張唔駛錢嘅接駁巴士飛,排咗一粒鐘卒之拎到(據講巴士飛只得600張)。 喺等點燈前,走入一間小店避寒,再食啲熱嘢打底(可惜都係要戶外企住食)。 點擊圖片放大 17:30-18:00第二次排隊: 就係根據巴士飛嘅時間去到站排隊上車,咁就排左30分鐘喇。 點擊圖片放大 車程只係8分鐘左右,據聞展望台位置有限,唔可以徒步上山,亦只限巴士上山。 上到山落車,諗住即刻有景睇。 18:15-18:45 點知又見到條隊(第三次喇),原來入展望台都要排隊,咁又排咗30分鐘,呢一刻係全日最大風最大雪嘅一刻,每人大約只有5分鐘望個景同埋大會影相機會一張。聽到有位香港人睇完出嚟用咗最多嘅粗口去發洩,相信係大雪都乜嘢都睇唔到。 好彩到我嘅時候啲雪開始雪細... 點擊圖片放大 +2 除咗呢個展望台外,沿路落山仲有兩個展望台,你冇睇錯,落山係要用腳行的。 因為7點半熄燈,見到有人跑返落山影相,可惜嚟到呢一刻,我嘅手腳同埋個鼻都已經凍到冇晒知覺,Iphone同相機都因為低溫症而不停熄機。喺以上所有生物同死物都要暖包嘅情況下,我放棄咗跑落山影相,改為慢慢行落去同邊行邊影相。 落到山點燈已經完結,當日仲係2017年最後一次點燈,實在唔敢相信,人流可以喺咁快散去(好明顯大家凍到極速徹離)。白川鄉最靜嘅一刻,係最舒服嫁。 點擊圖片放大 行咗一陣真係頂唔順,早啲行去巴士站,入面已經好多人等緊最後一班離開白川鄉嘅車,當中仲有唔小香港人,雖然大家都凍到眼紅鼻腫,不過一齊睇靚相係幾開心嫁! 如果你有諗過去睇點燈,實在要提你: 1)決定咗就唔好後悔 2)盡早計劃行程同做大量資料搜集 3)盡早訂所有嘢(包括住宿及交通) 4)有最大心理準備會好凍好大風雪 5)有最大心理準備睇到最靚嘅風景或者咩都睇唔到 6)同行朋友都要有呢份堅持同耐力 7)充足禦寒衣物,同暖包 8)點燈唔俾用腳架及自拍神器 零下n度喺戶外逗比n粒鐘,風景的確好靚,真係好童話世界,係值得既!不過最後都忍唔住講一句,白川鄉點燈一生人要去一次,而一生人去一次就夠喇! 睇呢條片就知...有幾大雪喇: https://youtu.be/N4fq_5CwS-4 襟個LIKE支持下我呢個偽blogger啦! Facebook: 離開是為了回來 (https://www.facebook.com/leavingisforcomingback/)