喺講呢條路之前，其實網上已經有好多好多篇野介紹過，自己好明顯係一個偽行者，一年只係行呢條路一次，所以唔係專業介紹，山路千變萬化，有唔同路線選擇，呢篇純粹開心share。 西灣亭→西灣→咸田灣→赤徑 喺西貢市中心集合，出發到起點「西灣亭」 1）於親民街老麥對出坐村巴29R ($17) 時間表 2）坐的士 (約$90-$100) 正式出發，由西灣亭行去西灣村，約40分鐘，頭段落斜為主，中段上山，尾段落山，沿路有樹陰，仲可以遠眺萬宜水庫。 點擊圖片放大 嚟到西灣，有幾間士多俾你嘆下休息下。 $12豆腐花 有唔少人會喺西灣海灘逗留，沿回頭路返西灣亭走或如下圖所示坐船返西貢市 經過西灣海灘再去咸田灣，路線係麥里浩徑二段，呢段路有不停上同不停落，約45分鐘，冇咩樹陰，但有海景嗌你加油。 回望西灣: 點擊圖片放大 +2 正當你喺烈日當空上氣唔接下氣嘅時候，就即將會有一個令你嘩一聲嘅靚景出現。 每次行到呢個位，總會覺得流幾多汗都係值得。 點擊圖片放大 仲可以影到呢張扮晒行沙漠嘅相 到達咸田灣，呢個被譽為最美海岸景點之一嘅地方，水清沙幼、有人露營、有人曬太陽、有人落水玩，個灘大到咁，想點玩都得。點擊圖片放大 +4 啲水真係清到不得了 對出仲有個島，俾人叫佢做Snoopy 島，都唔駛問點解啦可。 留意返，泳灘唔係康文署管理，姐係冇防鯊網冇救生員同急救服務，而且去咁多次都好大浪下，唔建議落水！ 沿海灘一路行，就會見到左邊條木橋，聞說條橋由士多老闆自己搭出嚟。相信因為風吹雨打，每年條橋都會唔同樣，今年雨季破壞力好強，條木橋真係得條木咋，扶手條繩都冇埋。 幾年前，平排都行到兩個人: 今年一個人行都危危地點擊圖片放大 嚟到士多，點都要獎勵下自己，我就例牌餐蛋麵，其他炒粉麵都勁有鑊氣。 點擊圖片放大 +3 食飽黃昏時候，出返去個灘同木橋。就見到呢個景喇。 最近逢親有倒影嘅地方都叫玻璃之鏡，咁唯有塞個名俾佢，就叫玻璃之橋啦。 喺海灘一樣有倒影！ 又留意返：木橋不停有人行過，唔准停低影相阻住晒呀！ 玩夠回程，可從咸田灣船返西貢市(約$150)或從士多後方條路就行去赤徑，45分鐘，先平路之後上山再落山。 呢段路個人認為玩完半日，幾攰下。到達赤徑可以坐渡輪($15-$18)或快艇($20-視乎人數)返黃石碼頭。 渡輪時間表 點擊圖片放大 都要留意：部分快艇有機會非法經營 撞岩時間，仲可以喺赤徑嘅紅樹林睇日落 點擊圖片放大 如果仲有腳骨力，其實仲可以喺赤徑行去北潭凹，約1粒鐘多啲(不過全程向上)。 今年旅程掛住影相行慢咗，天都黑曬，但就俾我哋見到... 冇圖冇真相，相就影唔到喇，拍咗片： https://youtu.be/fj5BhaBpzec 襟個LIKE支持下我呢個偽blogger啦！ Facebook: 離開是為了回來 (https://www.facebook.com/leavingisforcomingback/) 最後留意返... 1)呢條路對於偽行者有小小吃力，記得做足心理同生理準備。 2)部分路段有電訊公司會冇網絡。 3)沿路大部分路段冇街燈，唔好太夜出發。 4)見到螢火蟲唔好發出聲浪，更加唔好用閃光燈話燈照佢哋呀，其他動物一樣呀，個屋企佢哋嫁！ (網上圖片) 5)行過西灣段睇到咁，激死！喂，大嘥鬼日教大家，自己垃圾自己帶走呀！
