柬埔寨吳哥窟確實一生人要去一次 基於呢個地方仍然係發展中國家， 所以遊客嚟到呢度，唔多唔少都會成為水魚的。 坐tuktuk 喺柬埔寨兩大主要城市，金邊同暹粒入面，遊客主要都係以tuktuk為交通工具，正常暹粒機場入市區會係4-5美金，吳哥窟或者金邊包全日係14-18蚊， 暹粒酒吧街返酒店係2-3蚊，普遍第一次問價都會貴2-4蚊，只要行開幾步或者講一陣價，就會合理地調低了。 買水飲 安全起見，盡可能買樽裝水飲，每支1美金，不過同一間舖頭，有時當地人嗰支會大啲，遊客嗰支會縮細咗，唯一解決方法，就係嗌tuktuk司機幫你買。 警察小費 喺吳哥窟大部分景點都會有衣著整齊嘅警察，有啲會好積極叫你喺呢個位影相，當影完後，佢哋就會伸出手問你拎小費，當然可以俾又得，直接行開當冇嘢都ok，不過今次見個內地遊客俾完一蚊後，個警察竟然話「no no no, two dollars pls」 景點小朋友 喺吳哥窟部分嘅景入面，會有啲小朋友衝埋嚟叫你買嘢，又或者用純熟嘅廣東話、國語、英語數1-10，目的都係希望你買嘢，俾嘢佢食又或者俾糖佢。其實佢哋賣嘅嘢係好平，見岩嘅可以幫襯下，再唔係將水、文具、零食送俾佢哋，佢哋已經會用最純真嘅笑容多謝你。 Ps聽聞ｏ個度啲小朋友食得太多糖而蛀牙，大家都係送其他嘢好多喇！ Byebye你條尾 正當你check完in，過咗x光機喺海關嗰陣，交完護照等了一分鐘，佢又望住你不停打眼色，最後佢忍唔住開聲「tips tips 小飛小飛(小費普通話)」冇錯喇，海關人員真係問你拎小費呀。不過只要你夠堅持，不停擰頭扮傻，佢總會罷休俾返本護照你既。 講咗咁耐負面野，其實柬埔寨普遍都係好安全，旅客區亦都好企理，下次再講呢度嘅特別野！
