好多朋友都問有關於夏水禮問題，連續2日紅日都玩咗轉，喺度就一次過解答大家問題啦！ 買飛 夏水禮唔駛特別加錢入去玩，只要買左海洋公園飛就玩得 衣著 大家睇到有雜誌啲相著曬三點式，放心model入去影相先會著成咁，基本上任何衣著都入得去玩，泳衣得T SHIRT短褲亦得，女士們玩滑梯最好著T SHIRT穩陣！ 儲物室 成班人入去玩，最唔想就係要搵人"Hon"住啲背囊手袋，夏水禮側邊有儲物室，40蚊2粒鐘/ 100蚊全日，佢會俾一個膠箱你擺嘢，每個箱大約放到2-4個背囊左右，可以無限次拎嘢，夠晒方便。 沖涼／更衣室 玩得夏水禮，都預咗全身濕，場內有幾個公眾花灑位俾你沖身，沖完有更衣室可以換埋衫。 小朋友 夏水禮個hall入面幾多歲都入得，o個個大水桶同噴水範圍幾歲都玩得，其他設施有高度限制，矮過130cm 既小朋友可以去威威天地玩個水戰。 排隊 依呢2個紅日嚟睇，夏水禮最多人排隊嘅時間應該係中午至4點，如果想唔駛點排隊可以喺公園一開門，或者入黑後玩，個場好似你包起咁！ 路線 1. 一殺入去先去海洋奇觀(姐係海洋館)過一過冷河 2. 換衫玩夏水禮 3. 先玩個乾身啲嘅掟水彈(叫做) 濕身度:＊ 4. 再同LINE公仔影相 濕身度:冇 (但FEEL到佢哋好濕) 5. 打韆鞦 濕身度:＊＊＊ 6. 噴水位360度拍片 濕身度:＊＊ 7. 玩泡泡 濕身度:＊＊ 玩完泡泡你未必濕晒，但你一定會去沖身，所以都係濕晒 8. 又或者走去玩大水桶沖身 濕身度:＊＊＊＊＊＊ 9. 壓軸SIR埋條吹氣滑梯 濕身度:＊＊＊＊ 如果你係爛玩一族，又唔怕濕足全日，可以索性唔換衫繼續玩，基本上呢排啲太陽，好快會吹乾 10. 坐海洋列車或纜車上山 (但如果件衫濕晒坐海洋列車，可以肯定你第二朝可能sick leave) 11. 先玩激流 濕身度:＊＊＊＊ 12. 再衝落山玩 滑浪飛船x n次 濕身度:＊＊＊＊＊＊＊ 13. 之後可隨意玩過山車或其他機動遊戲吹乾件衫 14. 但切忌去北極館，到時唔止sick leave咁簡單 Ps: 夏水禮由7月1號至8月30號，可能未放暑假，暫時呢幾日都未算多人，要去襯早呀！
