當去歐洲俾人偷嘢已經係常識嘅時候,要識嘅就係去警署報案喇! 先講講自己一條友去歐洲4次俾人偷嘢嘅經過... 1) 喺巴黎坐地鐵, 突然有班小朋友衝入嚟跳舞同玩, 上網睇過呢啲都可能會偷嘢, 我即時彈開, 可惜開到下一個站佢哋衝晒落車, 我隔離個中國留學生已經出咗事, 衫袋啲錢話咁快冇晒。 2 ) 喺巴黎凌晨趕去機場,一出地鐵樓梯feel到有人摸個衫袋,嚇到大嗌,個男仔慢慢行開,好彩個衫袋冇擺嘢,事後有個女人走黎問我有冇事,我答完冇之後醒起網上有人話呢啲有同黨,我之後極速衝走(可能好人當賊扮,但唔理得咁多) 3) 喺比薩斜塔巴士站睇站牌,有一家大細衝埋嚟睇,過咗一分鐘已家人雞飛狗走,30秒後有2個警察跑黎問有冇事,直到嗰一刻先醒起嗰家人有男有女有BB,正正就係上網講嘅吉卜賽人喇, 又係好彩個袋擺心口, 冇事。 4) 喺羅馬地鐵站去洗手間, 除低咗手錶同手套放喺個袋最面嗰層入面, 落到地鐵一望個袋, 前後唔夠5分鐘, 拉鏈已開...頂 親身經歷過咁多次偷嘢經歷, 最後只係唔見手套同手錶, 已經「知足」 喇。 好彩羅馬車站入面已經有警署...(車站有好多係車站保安唔係警署, 意大利警署名做Polizia ferroviaria) 用咗10幾分鐘行到去, 外觀同一間執咗笠嘅舖頭完全冇分別 1首先要襟門鐘 (心諗我嚟報警,你估家訪咩) 2幾秒後佢會喺對講機講嘢 (冇錯,係一粒字都唔會明) 3講完一大輪佢會開門俾你, 入面...殘到你會驚呢度唔係警署 4叫我坐低再俾張紙我 (好明顯做慣做熟) 5之後佢要我填晒時地人同堆事發經過, 而佢係9秒9入返去唔理我 (好彩張表有英文對譯咋) 6最緊要係填清楚唔見嘅野, claim 保險用 7填完係再嗌返佢出嚟, 比本passport (多謝Abby Yiu提醒串錯字) 佢影印 8佢再copy埋張報案紙俾我,完 冇錯, 前後講唔到10句野,成個報案程序就攪掂喇, 可能言語不通, 又或者佢哋真係做慣做熟, 基本上, 呢個係一個登記程序多過報案程序。 一個亞洲人喺意大利,的確成為被偷野嘅好目標,但只要小心小心同小心啲,應該可以避到既,下次講下點先叫最好防範。