當你中咗postcard毒，就會發現真係好浪費時間。 輕微中毒 浪費時間：＊＊ 大部分旅遊城市嘅景點都會有一set N張嘅postcard賣，好處係一次過可以寄俾至小10個朋友，但堆卡有啲地方其實唔靚，仲有啲可能未去過，俾朋友問到o個度邊度都唔知點答。 中度中毒 浪費時間：＊＊＊ 如果嫌買postcard太悶冇新意，又或者覺得自己影相好靚，咁就可以選擇親自影完相之後拎去當地曬postcard相紙，再唔係就好似小弟咁，拎住部printer去旅行，呢個方便令你可以扮下發哥影風景相，仲要迫你啲朋友欣賞自己傑作。而且當你喺hostel拎部printer出嚟嘅時候，會即時有不同國籍嘅朋友埋嚟羨慕下，當然亦試過送埋postcard比佢地，識朋友真係話咁易。 劇毒，冇救 浪費時間：＊＊＊＊＊ 如果以上方法都未能夠滿足你嘅話，呢個方法真正 “獨一無異”，仲肯定係要好朋友你先會咁做。首先你要喺香港將朋友同自己嘅合照print好再die-cut，去到景點時將合照同景點影一張相，再好似以上方法print出嚟。冇錯喇，正宗帶埋你個friend去旅行就係咁樣喇！肯肯定，呢張卡比任何嘅手信更值錢！ 獨L嘅獨 浪費時間：＊ 好多人會寄返俾自己留為紀念，有人會寫好多篇嘢去記得自己嘅經歷，不過我通常只會寫一句 “呢度好靚，完”。 ps.收得多自己嘅postcard可能會覺得有啲過分，話唔定會去少幾次日本呢！ Postcrossing 喺網站登記，完成後，佢將會俾一個地址嚟，就係咁將postcard寄俾一個你唔識嘅人，完成後，一樣會有一個唔識嘅人寄postcard俾你，小弟岩岩寮緊第一張postcard，遲啲再報告！網址：https://www.postcrossing.com/ 寄postcard仲要知呢啲 1. 一到步預早買postcard同郵票, 好多地方郵局或者書店都有得賣, 不過小弟試過喺意大利郵局排咗半粒鐘先買到 2. 亞洲地方普遍郵費唔貴, 但歐洲試過HKD22蚊寄一張, 仲貴過張卡呀! 3. 聞說歐洲有樣野叫做student to student postcard mailing service, 只要喺郵票位寫住STS, 就可以免費寄返香港. 網上有人話OK, 不過我唔敢試 4. 正路好多地方機場都有郵局, 但我都試過冇又或者冇開, 安全起見, 回程前 日寄咗先, 又或者可以搵酒店,HOSTEL, Tourist counter 幫手寄 5.我好多朋友寄失, 原因係冇寫”HONG KONG”, 頂! 講咗咁耐, 好明顯真係好浪費時間, 入面嘅一筆一字, 錯別字, 要估嘅外星字, 一個風景, 一個古怪郵票….咁浪費時間，真係要寫同收o個個人先明白呢種感覺嫁！
