2016.03.27 Day 1 Seoul 前言 大學畢業後在某間物流公司打工三年，職場上未有太大突破，又對前面要走既路感到茫然。與其盲目做決定，倒不如比自己一個 break ，走出去外面世界，嘗試學習建立新生活，認清自我。所以毅然離開，決定到5年前曾 exchange 過既韓國 working holiday，以有限韓文底子 (TOPIK 2級) 過生活。 希望以文字係呢度寫低所經歷既事，不論甘與苦，都為自己留個回憶，為其他想去既有志者作為參考。呢度(儘量)唔會報喜不報憂，所有經歷都會(儘量)不偏不倚地描述。 出發篇 今日係 working holiday 的第一日。睇過唔少去 WH 既遊記，都會發現出發既第一篇都係緊張、刺激同期待。 “嘩！好興奮呀~超開心呀~” (高八度) “um,,,一陣落機點揾屋主呢?唔知今日匯率幾多呢?” (緊張 mode) 而我本人呢?我出奇地反而毫無感覺，出發前執好要執既野，睇返上機時間約相熟朋友食最後的下午餐。(本少係唔會坐凌晨機的) 出發前本想享用申請 AE 卡後國泰所寄出既免費 lounge 使用券，但同朋友食食下竟然唔夠時間要趕最後召集。 (喊出來，浪費左張野) 上機前一路擔心着究竟能否落機趕上地鐵到 shareflat。 (着落為首爾時間下午9點半，而且撘地鐵到個度係需要轉線)結果，係入境關卡前一條長長的隊伍輪候足足 45 分鐘！！ 最後逼於無奈地無轉線，係屋主指示下於首爾站落車撘的士到 shareflat。話說個時係凌晨12 點幾，一出站就凍到入心入肺。 首爾的士有幾款，據網絡資料所得，橙色的士係比外國人坐，司機識講英文，但價錢較其他略貴。(好似係) 就係咁樣，那夜凌晨，我坐上首爾站前往宿舍既橙的………. 點解頭先話好似係?因為上左車先發覺司機唔識講英文………..好彩我有屋主提供既韓文地址，如果唔係，就好似<<家有囍事>>入面既吳君如咁唔知去左邊 =,= 不過有樣野大家係要知，首爾的士同香港既都一樣，就算停定唔郁都計錢的。 事緣我係途中懶醒，想一落機就鍛鍊韓文，於是問司機我住個度仲會唔會有便利店開緊。(因為我好肚餓) 但佢就以為我問緊途中附近有無，於是途中車左去7 仔。買完野出來，佢竟然叫我食埋個包先開車走！ 當然，我就用爛韓文叫佢立刻、馬上開車啦！ 最後，凌晨一點幾終於到宿舍。附上緬甸 20 歲小鮮肉 大學生 roommate 後記﹕我走之前同朋友講我會寫網誌，但呢篇文係到韓後接近一個月先寫。 點解? 之後個幾篇會有講到。
