Take it easy, 我都唔係一個好學術既人，我只係想令大家睇得明所以我唔會講太多深奧既terms，輕鬆d當睇下潮文就ok:o) 相信大家都聽過幹細胞，美容廣告有蘋果幹細胞，臍帶血庫有得儲住d幹細胞用黎第日醫病，有時又睇新聞見到有大學又話幹細胞研究又有新突破，個感覺就好似係間意大利餐廳食飯，有個uncle自彈自唱意大利歌搞晒氣氛甘，你見到佢唱得好開心,高潮眼、黎克特制10級地震海牛音但係你完全唔知佢有咩甘enjoy~ 要了解呢個意大利uncle既內心世界，大家就要識下意大利文~如果唔係，就可能get錯~你以為佢唱緊情歌但原來佢唱緊粗口鹹濕歌:0)~同樣道理，你想用你想試幹細胞周邊產品，你就要去認識下幹細胞既本質，咩野係細胞老化，如果唔係就好大機會比人呃錢~正如我之前講過，香港地好多人靠偽科學呃飯食,唔想做受害者就繼續碌落下面睇~ 要分析意大利文歌唱得好唔好，首先緊係學左意大利文先啦~係講幹細胞之前，等我同你地講下d基本野先: 1. 細胞係生命基本單位，綜合黎講每個細胞都係一個獨立既運作單位。人係多細胞生物，由好多好多既細胞組成，就好似一個社會甘，有好多人係到生活，賺錢，洗錢，生仔，拆綠色炸彈，會老，會病... 2. 每個細胞都有器官(除左紅血球，佢份人冇咩內涵但係好幫得手)，細胞核就係佢個腦，呢個器官有晒成套由DNA姐成既software去經營成個人既所有系统。但係視乎細胞係咩種類，佢地只會做一部分既工作。例如白血球只會負責打細菌看門口，腸細胞只會負責吸收同消化，但佢地都係有齊整套你專屬、一模一樣既人類基因。情況就好似有位呀sir佢係識玩樂器，但係佢只會行必唔會無啦啦係條街到表演樂器，但係呀sir同真正係街頭表演既人都係人黎，都識得食訓痾~紅血球同好多其他細胞都唔同, 佢冇細胞器, 連細胞核都比佢踢走埋, 為左留多D位置比血紅蛋白幫我地運氧氣去全身既器官同埋帶二氧化炭走。 3. 人體有好多種細胞，佢地有唔同既工作。就好似有d人做機師，有d人做司機，有人做醫生，有人做清潔等等...例如紅血球負責供氧，神經細胞負責傳遞信息，肌肉細胞負責比反應, 癌細胞負責攪破壞~細胞工作無分貴賤。 4.唯獨有一類細胞比較特別, 呢種就係幹細胞(Stem cells)。佢地有d係未有特定工作，有d就岩岩搵到工但係未全面投入服務。“年年25歲扑扑脆“係得幹細胞先做到~佢地係長生不老既，可以選擇分裂並更新自己年齡或者分裂發展成其他細胞。佢地可塑性好大，可以發展成擁有特定功能既細胞以補充流失/死去既細胞。理論上我地運作中既細胞都係由幹細胞分化而成。就係因為甘，幹細胞技術既研究漸漸興起。同時成效一半真一半假既周邊產品亦隨之流行。 5.細胞衰老其實有好多原因，但係主要都係由於細胞進行無性分裂繁殖時, 基因最沒末端係複製完成之後都會遺失左一段。成件事就好似見一獲打一獲甘，每分裂1次就冇甘d。最尾當唔見左d重要基因既時候，甘個細胞就會失去左d重要既功能，而細胞老化到呢個地步就會死亡。當好多細胞都係甘，由佢地組成既組織(Tissue)以至器官(Organ)就會功能退化。而幹細胞有一種酵素(Telomerase)負責增新還原番DNA，所以佢可以長生不老。 關於細胞既基本資訊就係甘多，大家起碼有個慨念細胞，幹細胞有咩分別同埋咩係細胞衰老，下一篇酋長就會詳細d講幹細胞:) 歡迎分享比屋企人、朋友, 等多D冇機會讀科學既人認識呢D真科學:) 感謝大大 圖片來源: google 圖片搜尋
