4/4/2015 釜山之旅 第二日 去機張，狂食蟹! 海雲台，行Hea食! 去Centum City，玩spaland!(下集) 遲左成個星期先有第2日下集 Sorry! 香港人呀嗎 唔洗做咩! 放工返到屋企緊係訓下hea下啦 仲開著部電腦咩 好喇~ 講返正題，上集講到係機張食完蟹，搭39號車落迎月台睇花既~ 其實撘呢架巴士既路上面係可以睇到好多好多好靚既櫻花既~ 4月撘呢架車，佢個條街景真係好靚。差唔多撘左半個幾鐘，就落車喇。 落車位置就見上圖，呢個站係比較多人落車，跟大隊落無死架啦 (唔好問我有無圖，落車個陣已經係1拖8，無時間同你影相，想知點去未下次跟我去囉~) 有好多朋友竟然問我︰ 韓國都有櫻花架咩。 少年，你太年輕了! 黎過釜山，你就知道韓國都有好多櫻花，仲要都幾靚下。 呢個係迎月台既地圖。 強烈建議大家行黃色路線夠喇。因為橙色路線真係長多一倍。 我唔係好識用文字形容，大家睇圖啦 點擊圖片放大 +7 其實條路就唔難行既 一路向上山行，再行返轉頭，行大約1個鐘到啦(計曬你影相呀，睇下風景呀，買下野飲呀)，之後我地就出發去睇下海雲台既沙灘睇下啦。 又用返頭先既地圖喇! 其實由落車既位置，行去海雲台沙灘，只需要15分鐘左右(以1拖8既時間黎計算)係圖入面，mark住落車個個位側邊有個紅色字機張方面，再側邊有一條長直路，其實直落就已經係沙灘喇! 你會經過一條廢左既火車路(呢條路本身係舊火車線，即無窮花號會經過既路黎) 之後你就會落到依家沙灘喇 依家沙灘我相信，夏天黎會好好玩(小編已經想夏天走返轉) 你問我有無游水? 你都痴線既。 4月呀喂，想病既你未去游囉。 黎整張相，打個facebook 卡就閃人啦 影夠相喇，係時候要閃佢食少少野喇。 我地去左海雲台市場到食下野~ 要去海雲台市場好簡單，首先你要搵到釜山諾富特大使酒店(唔好同我講你去到海雲台見唔到呢間酒店，特別高特別大間架下!) 係酒店正門一出，向左行，對面你會見到圖下既建築物，之後過對面馬路，行兩個街口就會到。 我地係海雲台市場主要係食小食，姐係炸野食，魚板(無錯，又係)，年糕，豬手等等 價錢公道合理，味道唔錯，份量夠多，好岩鐘意食野既人。 我地個頭係海雲台掃完街，就黎手去伍班長食晚飯(個陣係韓國時間5點左右) 點去伍班長? 可以睇下下面地圖 喂! 唔係有埋地圖仲要我教路呀? 自己度下點行啦喂 點擊圖片放大 +7 你聽個名就知呢間野係豬架喇! 有咩野必食? 豬橫膈模 同埋牛排骨，個肉汁不錯既! 之後我地就出發去Centum City 既Spaland 沖下涼浸下 我地就撘地鐵，經3個站係Centum City (10號出口) 落車 呢個Spaland係我成個旅程其中一個最漓意既地方。 1，地方勁乾淨同舒服。 2，價錢勁合理。(夜晚8點後一人都係$70左右) 3，有好多汗蒸設備，浸溫泉有好多按摩function，有戶外足浴，有Sleeping Area，入面買野飲價錢合理 總結，呢度係釜山必去之地! 真係好正(我指間Spaland) 呢個Sleeping Area 不得了，睇住個落地玻璃加埋岩岩播緊英超，邊睇波邊睇景邊訓覺(喂!) 係度玩左兩個幾鐘，都係時間要閃人了=[ 下集: 遠征慶州，訓住去佛國寺，暈住去普門湖食韓牛，等成粒鐘無巴士返火車站!
