畢業後誤打誤撞入左間蚊型航空公司做男空姐，轉眼已好幾個年頭。慢慢地愛上飛行，更愛上了遊世界。 做人無咩大志，雖然工作上飛來飛去都只是偉大的強國，但都想靠自己善用每年珍貴的24日大假好好去看看這個美麗又多姿多彩的世界。 想襯還有所剩無多的青春，好好記錄一下輕狂又寶貴的獨遊經歷等等..... 屈指一算，至今到遊玩過西班牙、德國、英國、俄羅斯、荷蘭、捷克、奧地利、匈牙利、澳洲、比利時、法國、意大利、希臘、愛琴海、美國。正一步一步擴大版圖！ 畢業那年，其實真係好唔想畢業，但無計，不想繼續讀Master 更加無錢讀 Master。 心想人生最後一個暑假，老死玩大佢！ 先係五月尾同自己的 BFF們去左泰國。 個年日本話咩有幅射，人人都唔敢去，驚生畸胎，生cancer，旅費超平，又剛剛碰到巧巧我家姐有幾日婚假，她問我：「細佬，去日本你拗唔拗？」我答：「你唔拗，我唔拗啊！」然後開開心心又去了我人生第一趟日本東京。 （過左一年我家姐咪生左個又肥又白的B）玩左五日，又去迪迪尼又盛盛盛，整個旅行先洗左六千大元，但對我呢個 fresh grad 來說，我的銀行餘額已經…… 翻來了香港，以我這極度爛玩爛蒲的性格，又怎甘願就此投入社會的鱷魚潭。 又一次剛剛碰到巧巧我收到銀行電話問我借唔借錢，我考慮左一陣，覺得息口都算平，就一口氣借左二萬蚊，然後去歐洲！ 好，有左錢，就問下大學同學仔去唔去。得到的回音都係「無錢」，我又點會唔理解。算，唔迫人，唔好煩，我一條友去！
