根據食物及衞生局（簡稱食衞局）官網，自願醫保計劃（Voluntary Health Insurance Scheme 簡稱 VHIS）有政府監管，又有得扣稅，的確係有一定吸引力，但喺你決定 轉保 之前，Bowtie 資訊團隊建議你最好問一問自己呢4個問題︰ 1.你份保險同自願醫保有咩唔同？ 市面上嘅醫療保險大多數唔保精神病。而自願醫保計劃認可產品保單範本就訂明，產品將保障「住院接受精神科治療所收取的合資格費用」。 另外，自願醫保亦會保障「訂明診斷成像檢測」如磁力共振（MRI）等費用（投保人須付30%費用），無論喺門診定醫院檢查都有得Claim！ 如果你需要以上呢啲特別保障，就應該考慮吓係咪適合轉張單去自願醫保喇。 2.你需唔需要終身無限保額？ 一般保險產品唔受食衞局監管，收緊保單條款嘅自由度較大。 舉個例，大多數醫療保險都有賠償限額，一世人最多賠幾百萬，有啲產品則標榜賠到過千萬，但其實保險公司喺每一個新保單年度都有權更改保單條款，例如因應你嘅索償情況增加保費。 相反，自願醫保不設終身保障限額，只設每年$42萬上限，即使投保人每年Claim足$42萬，保險公司都要繼續賠到100歲，冇權收緊呢個限額，只可以將條款愈改愈好。 3.轉移計劃時，保險公司會否重新核保？ 根據食衞局網站，自願醫保計劃推出後，市場上會出現3種情況︰ Case 1︰喺下一次保單續保時，保險公司直接將你嘅現有保單續保至認可產品，即係於同一產品加入自願醫保計劃嘅保障特點。 Case 2︰保單持有人有權於「轉移期」內，選擇將現有保單轉為同一間公司推出嘅自願醫保，並獲得自願醫保嘅保障，但公司有權重新核保。 Case 3︰保單持有人有權於「轉移期」內，將A公司嘅「非自願醫保」轉移至B公司嘅「自願醫保」，B公司有權重新核保。 有啲保險公司為咗搶佔市場，未必要求所有轉移個案都需要重新核保。所以，你要睇清楚保險公司嘅「重新核保」條款。 4.轉自願醫保可否保留折扣優惠？ 所謂「有事賠畀你，無事獎勵你」。例如，某啲保險公司有提供無索償獎勵/折扣 (即 No Claim Bonus/Discount) ，如果你冇索償，下一年度嘅保費就有折扣，以鼓勵投保人維持健康生活。 當你想將保單轉移至自願醫保，甚至轉去其他公司嘅自願醫保，一定要問清楚，仲會唔會有「折扣優惠」。 溫馨提示︰留意埋「等候期」同「轉移期」 一般嚟講，如果你係新客戶，完成投保手續後30日內係冇得Claim 任何賠償，呢段時間叫做「等候期」。不過，自願醫保計劃會豁免「等候期」（投保前未知的已有病症除外），令保單不間斷地生效。 最後，你要留意埋「轉移期」，食衞局建議保險公司給予1年時間，讓投保人考慮轉唔轉自願醫保，而保險公司都可以自由決定「轉移期」係幾耐。 但如果你過咗「轉移期」先決定轉張單去自願醫保，你就可能需要終止現時保單，再買過份新嘅自願醫保喇。 *本文章內容由Bowtie資訊團隊提供並只供參考，Bowtie 對於任何人因為使用或誤用任何信息或內容，或對其依賴而造成的任何損失或損害，不承擔任何責任。 文章來源︰已買醫保想轉「自願醫保」？轉保前你要先問自己4個問題！
