自願醫保計劃（Voluntary Health Insurance Scheme，簡稱VHIS）受食物及衞生局監管，每間公司推出嘅產品保障條款大同小異，「標準計劃」更加有機會一模一樣，咁如果想買自願醫保，應該揀邊間好？ 有啲人會覺得保費愈平愈好，但其實每間公司嘅產品設計、投保方式、索償程序都有分別，喺選擇幫襯邊間公司嘅時候，最好考慮埋以下呢5個因素！ 1.你想買「投資+醫保」定「純醫療保障」產品？ 現今保險業大致分為兩類公司，其中一類公司除咗賣醫療保險，亦會提供有儲蓄或投資成份嘅保險，而另外一類公司，只專注提供自願醫保呢類「純保障」。 喺選擇公司果陣，你就要諗吓係咪想將「投資重任」交俾保險公司。如果係嘅話，你除咗需要俾管理費，保單到期日前中止張單仲有可能要俾「手續費」。如果想自己做返投資，而又差一份住院保險，建議你揀一間專門提供自願醫保嘅公司。 因為專注自願醫保嘅公司會擺100%時間同資源去了解投保人嘅需要，客戶服務及索償團隊亦會對自願醫保較為熟識，投保人容易搵到適合自己嘅產品之餘，獲得嘅索償支援亦會較全面。 2.瘋狂折扣係咪好著數？ 喺自願醫保推出市場嘅時候，保險公司為咗吸客，好大機會提供「瘋狂折扣」蝕住賣俾你，但你要留意返，好多折扣都有限期，例如只限首年投保。 去到第二年續保時，保險公司首先會收返你正價，再因為你大左一歲而加價，最後個價同第一年可能相差好遠，令你大失預算。 你可能會諗︰「加得太多咪轉第二間公司囉，起碼賺咗第一年個優惠！」但要記住，買保險係買緊長遠保障，第二年轉去第二間公司再買，未必會過到核保。 所以，比較唔同公司嘅價錢果陣，最好問清楚個正價係幾錢，即使往後加價，亦有數得計。 3.網上投保一定好？ 好多人會上網買旅遊保險，因為保障條款相對簡單，自己都識睇。咁自願醫保又應唔應該上網買？ 自願醫保受政府規管，間間公司賣嘅「標準計劃」保障好大機會一模一樣，唯一唔同嘅只係價錢。如果你已經對自願醫保有充分認識，唔需要搵人去幫你選擇產品，就強烈建議你直接上網投保。原因好簡單，因為網購保險嘅價錢除咗比較平，亦好方便，慳返你好多時間。 網上投保後，當遇到任何問題，你仍然可以打電話查詢，由經驗豐富兼持有牌照嘅客戶服務專員解答問題或解釋產品條款。只要間公司有足夠支援，產品條款透明度高，你就可以放心透過網上投保。 4.有冇足夠索償支援？ 自願醫保屬於個人住院保險，相比人壽或危疾保險，Claim錢機會比較大，所以一定要深入了解索償程序。喺網上做research 果陣，不妨睇埋間公司嘅網站，除咗傳統書面Claim 保險之外，有冇另外提供網上索償途徑。 上網Claim 保險已經成為新趨勢，有啲公司只需要客戶Upload 指定文件，就Claim 到錢。如果想喺網上買自願醫保，最好問吓間公司有冇電話支援、幾耐收到索償金額、點樣睇到索償進度等。 5.係咪一定要搵大公司？ 成日聽人講︰「買保險一定要搵間信得過嘅公司」，點解？講到尾，買保險都係想「Touch Wood」有事果陣有錢賠啫。 其實香港所有保險公司都受到保監局嚴格規管，無論大公司定新公司都必須按保單合約賠償。而且，每間公司都需要Meet 到最低資本要求，所以你唔需要驚保險公司冇錢賠。 咁係咪一定要搵大公司？咁又唔一定！ 首先要睇吓你買緊咩類型嘅保險，如果想買長期保障，公司品牌及信譽就變成好重要嘅考慮因素，相反，如果想買一啲年年續保嘅產品，例如家居保險、醫療保險等，咁就唔一定要幫趁大公司。 另外，你喺大公司Claim錢或投保，通常要經過好多程序。反而著重科技嘅新公司，效率一般會較高，最快可以24小時即刻處理你嘅投保同索償。 *本文章內容由Bowtie團隊提供並只供參考，Bowtie對任何人因使用或誤用任何信息或內容，或對其依賴而造成的任何損失或損害，不承擔任何責任。 文章來源︰自願醫保揀邊間好？折扣優惠之外你要考慮埋呢5大因素！
