身為資深暗瘡患者,小妹認為最慘唔係生暗瘡嗰刻,而係累積落嚟嘅烙印!一瘡未平,一瘡又生,根本無時間修復痘印同凹凸洞。小妹深信,到咗某個階段,自然會生少啲、甚至唔生暗瘡。但係,損壞咗嘅皮膚,有錢都未必可以搞返好。 所以,瑕疵皮一定、一定、一定要學好化妝! 用咗個半月Heynature魚腥草系列(按我),皮膚穩定咗好多。趁著臉上無傷口,小妹想分享下過去一年累積嘅遮瑕心得。 唔一定用Armani、YSL嘅粉底先做到高遮瑕度、妝效持久,只要掌握技巧,用平價產品一樣可以化出完美底妝。 唔好以為化妝工具係化妝高手專用!臉上越多瑕疵越要靠佢哋!蜜粉掃、遮瑕掃、美妝蛋係必要嘅「底妝三寶」! Real Techniques嘅Miracle Complexion Sponge(約HK$65)出名性價比高,有「平價Beauty Blender」之稱,仲比BB多個橫切面,更加實用。 蜜粉掃嘅毛一定要夠密、夠柔軟,否則定妝時會刮花搽咗嘅粉底液。意外喺Carousell搵到呢支EcoTools Bamboo Powder Brush(約HK$70-90),幾好用。 遮瑕掃要買呢種扁平、尖頭、掃毛夠堅挺嘅,咁先可以準確鎖定遮瑕位置,唔會將遮瑕膏越推越大笪。呢支Lancome遮瑕掃都係喺Carousell買嘅,專櫃好似無得賣。用咗成年仲好似新嘅一樣,好耐用! 今日小妹會化一邊臉,最後做個前後對比。 最近皮膚真係好咗好多,臉頰一粒瘡都無o(≧v≦)o。 暗瘡肌化妝嘅第一步——亦係最重要嘅一步——係搽防曬,否則暗瘡印永世都唔會褪!!! 礙於搽太多嘢上臉會黏笠,小妹偏好用自帶防曬功能嘅底妝產品。 shu uemura嘅primer分保濕型同控油型,呢款POREraser CC UV under base mousse (HK$370/30g)係控油型嘅,防曬指數有SPF35 PA+++,#beige適合自然偏白嘅皮膚作自然提亮。 擠出嚟係綿密細緻嘅泡泡,初時用可能較難控制份量,用多幾次就慣。 雖然佢係for混合性偏油肌膚,搽上皮膚感覺都幾滋潤,質感卻又好清爽。 唯一缺點係唔太方便,一定要用美妝蛋或海綿上先會自然貼服。用手搽,會推唔勻、假白、加深肌膚紋理,同埋好慢。 好多教程都會教你:先將美妝蛋打濕,用嚟搽粉底液,個妝就會貼好多。相信唔少人(尤其新手)都會誤以為個妝貼係因為美妝蛋入面充滿水份,水份會轉移到粉底液。有人甚至會用噴霧噴濕美妝蛋就當打濕咗。 其實要靠咁樣嚟臨急抱佛腳係唔會補濕同保濕㗎╮(╯▽╰)╭。 要打濕佢嘅真正原因係,美妝蛋吸水後會發脹,變得軟綿綿、有彈性,可以做到輕柔地按壓喺皮膚上,推粉底唔會對皮膚造成磨擦、刺激。 最好開住水喉,一邊用水沖佢,一邊擠壓美妝蛋,等水份完全滲入,最後將佢擰到唔滴水就可以用。 由於臉上瑕疵太多,為免底妝過於厚重,小妹習慣先遮瑕、後粉底。 小妹常用嘅液體遮瑕有NARS Radient Creamy Concealer #Light 2.5 (HK$290/6.5ml)同the SAEM Cover Perfection Tip Concealer SPF28 PA++ #1.5 (約HK$35-50/6.5g)。 一個係歐美大牌,一個係韓國開架品牌,但遮瑕力不相伯仲。 NARS加入保濕成份,而the SAEM就比較乾。眼底容易起乾紋,小妹喜歡用NARS遮黑眼圈多啲。 好多人話CANMAKE Color Mixing Concealer SPF50 PA++++(HK$82)又平又好用。反正嗰陣小妹無呢種可調色嘅遮瑕盤,就買咗最自然嘅#01嚟試下。 裡面嘅遮瑕膏本身已經比較厚身,附送嘅掃仲要十級唔好用!掃毛又粗又硬,成支水彩筆咁。 一搽上眼肚位置,OMG!用呢個掃根本無辦法搽勻,啲掃痕現哂出嚟。 反而另一邊海綿頭唔錯,挺身得嚟夠軟熟。 輕輕一點,就可以遮住細細點嘅瑕疵。可惜,好易甩,好快要補。 總括嚟講,CANMAKE遮瑕盤唔值得買! 小妹嘅暗瘡印又紅又密,齋用膚色遮瑕膏唔夠遮,必須以綠色遮瑕膏中和。 早排跟風買咗呢盒NYX Color Correcting Palette (HK$160),無錯嘅幾抵幾好用,但除咗綠色,其他幾格都用唔著 lol。 NARS #Light 2.5嘅tone偏紅,而the SAEM #1.5比較接近膚色,小妹更愛用後者同綠色遮瑕膏混合,用嚟遮暗瘡印。 如果唔想調出嚟嘅遮瑕膏太綠,可以取出適當份量後,放喺手背撈勻。不過佢哋都乾得好快,未用哂就黐到實一實 (證明喺臉上都可以好持久),所以小妹通常會直接喺palette綠色格上面溝。 用掃遮瑕嘅效果可以好精準、細緻。 小妹嘅臉頰有明顯泛紅,用掃大範圍上遮瑕膏畀用手指印、直接搽要薄好多。而家上咗一半,睇下分別? 近睇花哩花碌,但陣間用粉底液蓋住就唔覺。(最近嘴邊濕疹,又紅又痕又乾T^T。) 全部遮瑕完成! 今次用嘅粉底液係喺網上好hit嘅Catrice HD Liquid Coverage Foundation,小妹買咗最白嘅色號#010 Light Beige——其實都唔算好白,而且佢會氧化,自然膚色用就啱啱好。 佢嘅賣點係遮瑕力超高、持久、輕盈、控油,重點係非!常!平!香港無官方購買渠道,代購價約HK$95-105,小妹喺淘寶買就RMB50-60。 先將粉底液均勻點上臉。 然後用美妝蛋輕輕印開——千萬要輕手,否則會整甩之前搽嘅遮瑕膏! 而家所有平面瑕疵好似痘印、色斑、泛紅已經消失哂lu~ (凹凸洞實在無辦法,因為凹陷就算搽乜都見到凹陷陰影。) Catrice粉底由買返嚟到而家已有4個月,小妹認為佢嘅遮瑕力無人哋講嘅咁驚艷 (當然,自己塊面爛到咁,都唔可以對佢要求咁高 XD),但當配合埋遮瑕產品,效果算係相當唔錯。 (千祈唔好期望齋用任何一款粉底就可以遮住全部瑕疵,除非你本身皮膚超好,或者搽十幾層。) 佢的確好適合油性皮膚同暗瘡皮膚喺春夏使用,因為佢唔厚重、唔會悶痘、控油。冬天用就太乾啦,乾性皮膚直情一年四季都唔會用到。 innisfree No-Sebum Mineral Powder (HK$54/5g)相信唔需要小妹多介紹啦,又平又好用,一搽,皮膚即刻變乾爽。可以控油控幾耐,就視乎用量。 韓國innisfree仲出咗好多同系列、唔同功效嘅碎粉,不過無喺香港賣。冬天乾燥,小妹向代購買咗主打保濕嘅No-Sebum Moisture Powder(同價)嚟試下。 佢同控油款唔同,碎粉唔係白色,而係肉色,但其實搽上臉咩調色效果,估計任何膚色可用。 用咗幾次之後,小妹簡直後悔到不得了!覺得佢既唔保濕,又唔控油。 公道啲講,用粉撲取粉嘅份量又真係少咗啲。 後來,試下將碎粉倒落化妝掃再拍上臉,就搽得均勻好多同快好多,搽多幾層就無咁笠。 如果仲係覺得容易溶妝、產品唔夠控油,無有怕,用烘焙(baking)方法就解決到。 繼續用呢盒被小妹嫌棄嘅碎粉嚟示範。 先倒出大量碎粉。 用半濕嘅美妝蛋取粉,多啲都唔緊要。 將碎粉印上臉部最容易出油溶妝嘅部位,例如T字位、眼底,搽到好厚、白哂都唔緊要,視乎自己嘅出油程度。 最後,用掃輕輕打圈、全臉掃勻碎粉。 如果喺炎熱、潮濕嘅日子,可以等多陣、等碎粉喺容易出油嘅地方更加牢固之後,先至掃開佢。 掃勻之後,底妝睇落唔算厚重,唔單止令妝面會變得霧面啞光,仲可以修飾毛孔、更加控油! 基本上用每款碎粉都可以做到呢個效果,因為粉本身係乾嘅,只要大量覆蓋喺皮膚表面,就可以阻隔油脂污垢。(原理好似炸嘢前要蘸生粉一樣。) 每次用呢個方法定妝,去到夜晚摸下塊臉,依然係乾爽㗎! 整個妝容完成! 再嚟個左右對比! 如果有人喺街見到小妹一臉痘印個樣,請唔好懷疑以上嘅圖有P過。只係不屑為街上路人甲嘅目光花咁多時間化妝。 去到呢個moment,其實已經唔會再嫌棄有瑕疵嘅自己,反而學識欣賞自己靚嘅嘢。唔係人人化咗妝一定靚㗎( ̄∇ ̄)。 就算拍拖都懶得遮痘印,平時主要搽防曬、畫眉(must!!!)、搽碎粉控油、搽唇膏,個人企理、精神就算。 除非有演出或者去影相啦,將自己最靚嘅一面紀錄低,得閒J下自己會開心好多(⁎⁍̴̛ᴗ⁍̴̛⁎)。 希望大家喜歡小妹嘅文章,請follow小妹的instagram~ *** 呢篇唔係邀稿 *** cafchiu@gmail.com https://www.instagram.com/happychiu/