Lancôme出名係貴價品牌,但仍令一眾女士趨之若鶩。小妹係小資女,又長期深受暗瘡困擾,就算忍痛破費都以消炎抗痘skincare為主(。 ́︿ ̀。)。 而最近,小妹竟然有機會試用Lancôme嘅經典「小黑瓶」Advanced Génifique升級版嫩肌活膚精華肌底液(HK$695/30ml;HK$970/50ml;HK$1100/75ml)!!! 早喺2009年,Lancôme就推出咗Génifique嫩肌活膚精華,當時已做到強化基底、柔嫩肌膚嘅效果。 到2013年,Lancôme喺配方中加入獨家皇牌成份saccharomyces cerevisiae酵母萃取,調製出風靡全球嘅升級版「小黑瓶」。 呢項超級配方嘅原理係先令表皮分層更綿密細緻,強化肌膚保護屏障,然後酵母再對真皮結構發揮作用,從內修復肌膚底層細胞,促進細胞基本元素合成。 簡單嚟講,係可以改善10大肌膚問題:膚質、回彈力、彈性、緊緻度、鬆弛度、細紋、皺紋、光彩度、膚色均勻度、清晰度。 小妹都有拎過Génifique試用裝,但只係畀咗母親大人——畢竟小妹得24歲,咁快用咁勁嘅抗衰老產品,幾時抗到老啊! 大家都知,千年暗瘡喺小妹塊面留下唔少烙印。不得不承認,自己嘅肌膚年齡分分鐘大過中年婦女(T ^ T)。其實爆完瘡,最緊要修復。 先要講下個樽,佢唔係一般嘅滴管式精華,唔係擠壓式泵頭,而係按壓式。呢個設計令「小黑瓶」外觀更elegant,但係濕咗會跣手,最好抹乾手先撳。 佢係一種灰白色半透明液體,比toner濃稠,又比一般精華液流動性高。 小妹皮膚偏油,加埋出汗,夏天每次搽完skincare,塊面就黐笠笠——都唔知係汗,抑或根本吸收唔哂。 但「小黑瓶」比想像中輕盈。用故意用大泵啲——半支管嘅份量,只要用手輕輕按壓,半分鐘左右就吸哂,皮膚表層轉瞬由滑潺潺變成黏黏地,最後回復清爽。更意想不到嘅係,油脂分泌特別旺盛嘅T字位居然比面頰吸收得快。各位油皮可以放心使用! 過去2星期入面,小妹每日早晚喺toner後使用「小黑瓶」 ,然後再搽其他精華同敷mask,因為佢可以加強後續護膚品吸收同發揮作用。 上星期,小妹經歷咗嚟M爆瘡。「小黑瓶」雖無法阻擋排山倒海嘅暗瘡(小妹夜瞓亂食嘢亦有責任╥﹏╥),卻積極進行緊重建工作! 以往完M後幾日,仍然會出現「餘瘡」;今次反而謝得徹底!根據母親大人觀察,小妹雙頰近耳仔位置嘅千年毛孔亦收細咗——佢話佢日日坐喺小妹左邊食飯,特別留意到。 小妹知道自己嘅使用效果唔算明顯,無咩說服力——係嘅,因為皮膚實在受損得太嚴重,要徹底修復,必須借助醫學療程。 咁點解仲要用佢呢? 好多含有抗衰老成份嘅高價品牌產品對於年輕肌膚實在太豐盈,莫講有無效啦,連吸唔吸收到都成問題。Lancôme「小黑瓶」嘅最大優點於用家能實實在在見到佢完全進入皮膚,一滴都無浪費。 年輕或油性肌膚想對抗衰老、修復皮膚,不妨試下用佢。 Lancôme 官方網頁: https://www.lancome.com.hk/zh_HK/home Lancôme Facebook專頁: https://m.facebook.com/lancomehk/ *** 產品和資料由品牌提供