充滿冒險精神嘅小妹熱愛網購，最近又喺iHerb訂咗一堆E.L.F.嘅產品。好多人推崇呢個美國開架品牌，一來不經動物測試，二來價廉物美。 今次，想同大家分享下用後感，總結下究竟佢哋值唔值得入手。 先介紹iHerb，佢係個由外國直接訂貨嘅網購平台。大家可以喺入面買到好多歐美品牌產品——總之就係大部分喺香港無官方門市嘅，有日用品、保健產品、美容產品等等。最正係價錢實惠！唔好以為要大量購入先抵啊。 買咗11件items（部份幫朋友買嘅），連埋各種折購優惠，一共HK$335.16，滿HK$314仲包順豐送貨！8月18日由美國寄出，8月20日下午就送到小妹屋企( ^ω^ )。 所以嘛，有啲錢根本唔需要畀代購賺╮(╯▽╰)╭。留意，價錢或會隨匯率浮動。 淨痘去疤妝前乳-透明 Blemish Control Face Primer (HK47.57/14ml) E.L.F.出過幾款primer，分別有保濕、收毛孔、亮澤等功效，小妹一見到呢款就欲罷不能！因為之前一直搵唔到暗瘡皮膚專用嘅綠色primer——本來想買bareMinerals新出嗰支，然後就發現咗E.L.F.，當然試平嘢先。 佢無防曬功能，要另外搽防曬產品。 一心想買減淡泛紅嘅綠色primer，擠出嚟見到係白色，好失望⋯⋯然後先醒起info寫明係「透明」orz。佢係隻幾清爽嘅半透明白色乳霜，搽上皮膚有啲滋潤感，但又乾得幾快。 產品內含有水楊酸、維他命E、茶樹，控油效果唔錯，卻又唔令皮膚乾燥。用咗一星期左右，早排下巴位置生咗個幾月嘅痘痘群逐漸謝哂！ 撇除缺乏調色功能，以呢個價錢嚟講十分值得回購！只要用隻高coverage嘅粉底液就可以解決。 由於今次無買粉底，小妹搵咗包sample化底妝，係HABA Mineral Essence Liquid Foundation (HK$390/30ml)嘅02號色。 輕透控油粉餅-半透明 Translucent Matifying Powder (HK$24.37/3.8g) 粉盒入面塊鏡都幾大。可能運送途中受過猛烈撞擊，粉餅碎咗少少，但佢本身唔容易跌粉。喺膠片保護之下，即使每次用完將粉盒打斜放，塊鏡仲算乾淨。 Info稱粉餅係「半透明」，但好明顯唔係lol。粉餅嘅粉質好幼細，用粉撲沾完都無乜點飛粉。 佢嘅控油效果比頭先支primer更勝一籌，有提亮作用，更即時做到啞緻妝感，摸上去滑不溜手，但對毛孔、凹凸洞幫助唔大。 佢顏色帶紅，用咗幾次之後，小妹赫然發現佢令面同頸出現兩截色——唔知點解影相無肉眼睇咁顯眼。 佢可為蒼白皮膚增添紅潤，同時相當有中伏危機，因為佢既唔係「半透明」，實物同iHerb張相嘅色差亦好大！可能皮膚黑少少嘅朋友用會安全啲。 明亮調色板-粉末 Illuminating Palette (HK$47.57/16g) 大家要買E.L.F.任何palette嘅話，千祈唔好相信盒面嘅色樣——色差十級嚴重！盒面嘅4隻色似陰影色多啲(-｡-;。 #02至#04睇落好深，用手指畫上皮膚後，只有#04較為顯色，但又未至於係實色，可用於自然妝感嘅陰影部分。小妹皮膚尚算白皙，暫時只用緊#01打光，深膚色嘅朋友可以用#02、#03——說穿了係小妹唔識用其他色orz。 妝效令人滿意，齋做highlight唔做contour已經令五官更立體。另外加咗Canmake花瓣胭脂03號色。 缺點係啲粉太容易畀化妝掃篤散，唔明點解呢個盒唔連膠片。 值唔值得買就見仁見智啦，以價錢嚟講，頗適合化妝新手。 腮紅刷 Blush Brush (HK$23.78) & 高光刷 Highlight Brush (HK$23.78) 小妹同母親大人本身已經用緊E.L.F嘅化妝掃，覺得唔錯。老實講，小妹以往常用嘅化妝掃只有眼部化妝掃，對於面部化妝掃嘅認識唔算深入。 初步覺得掃毛唔扎肉；抓粉力強之餘唔唔會殘留粉末，沾粉後輕易辨認粉末份量。 黏土眼影調色板-星期六日落 Clay Eyeshadow Palette (HK$47.57/7.5g) 每次買開架品牌眼妝產品都係一場賭博，因為最容易出事！顯唔顯色都唔緊要，最驚溶妝，眼影、眼線、睫毛膏一花可以毀咗成個妝！有嘢跌入眼仲大問題啊。 盒內有膠片保護塊鏡，仲寫明用法，呢個設計方便新手使用。 除咗#04係啞光，其他都帶有微微珠光，顏色自然。用手指沾出嚟嘅顏色勻循、透薄，感覺粉質柔軟。 用掃上效果卻大相徑庭。眼影掃沾嘅粉多，更將原來壓縮成粉餅狀嘅眼影粉掃散，導致飛粉。掃上皮膚嘅粉掃極都唔勻，反而越掃越開，掃咗好多下依然清楚見到眼影粉末——原來都幾大粒。 為咗儘量避免脫妝，小妹先搽上shu uemura持久顯色眼影底霜(HK$200/12ml)——私心推介！ 根據膠片上嘅用法，先用#02打底，然後用#03為加深眼蓋，跟住用#04填滿眼皮摺位，再用#05貼近睫毛根部畫上眼線，最後用#01打亮眼皮中央。 化出嚟係靚嘅，但係請仔細睇下幾多粉跌哂落下面⋯⋯ 喺過去一個星期，小妹每次出街都有用呢盒eyeshadow。每次出去2、3個鐘左右，就會發現眼皮摺位越嚟越淺色，眼肚卻多咗個黑影，仲衰過未遮黑眼圈之前ಥ_ಥ。 定妝噴霧 Matte Magic Mist & Set (HK$23.78/60ml) 講噴霧嘅同時，可以繼續講盒eyeshadow。 小妹同樣喺手背搽咗shu uemura eye primer同啱啱嘅eyeshadow，再加上定妝噴霧。噴霧乾咗有啲黏笠——聽聞係正常嘅，小妹以往無用開setting spray。噴霧乾透之後，小妹用紙巾輕輕一沾——請相信，真係好輕手！即刻甩色！究竟係eyeshadow唔安全定係支噴霧唔可靠呢？ 個樽嘅設計都有唔妥，一噴就滲哂出嚟，望下張紙巾就知道有幾濕，每次噴完，樽身都變得笠黐黐。 Makeup Remover Pen - Clear (HK$23.78/2.2g) 原本以為買咗樣方便嘅小用具，結果只係雞肋。佢係用嚟當擦膠咁用，可以修改妝容瑕疵。畫落皮膚會出現一道透明、令身嘅痕跡，似係卸妝油。 小妹嘗試用佢嚟擦走左上角嘅深啡色，發現佢並唔會完全抹走彩妝，只係將粉末推散，令顏色無咁飽和。結果，深啡色雖然無咗，但珠光粉肉色亦成忽移咗位。 使用後嘅remover pen由純白色變色污卒卒，一抹落紙巾就甩色，究竟點先可以徹底清潔筆頭呢？ 唔係話佢無用，只係似乎用即棄棉花棒仲方便啵。 唇刷 Beautifully Bare Lip Brush (HK$23.78) 小妹唇線唔明顯，嘴邊佈滿暗瘡印，好難畫出細緻唇形，最好用唇掃。 伸縮同蓋掩設計方便外出使用。 刷毛軟身而鬆散。 小妹擁有唇膏唔多，揀咗最鮮色嗰支KIKO半透明亮彩口紅214號色做試驗。 可能經驗問題啦，小妹覺得太難用喇！散開嘅刷毛好難準確描畫唇線。加咗4、5次唇膏，畫出嚟依然好淺色，顏色亦唔均勻。最大缺點係刮甩好多皮——搽幾厚潤唇膏打底都無用(｡ ́︿ ̀｡)。 直接搽上嘴，效果反而更靚，唇色更亮澤！ 抵到爛嘅網購，換來跌入谷底嘅心情⋯⋯好彩價錢唔貴，未至於荷包大出血。奉勸各位，唔好太相信產品外觀同宣傳文字。 嘔心瀝血嘅分享到此為止，謝謝收看(╥﹏╥)！
