如果要揀一個最愛嘅護膚品牌，小妹一定會毫不猶豫咁答茶靈。雖然唔係完全用緊佢嘅產品（因為太貴），但佢係唯一一個一出新product就吸引到小妹飛去專門店體驗嘅品牌。 茶靈係法國LVMH集團旗下嘅護膚品牌，產品賣點係以珍稀森林古樹普洱茶為美顏之本。其中LVMH開發嘅B-DT Complex™配方，有效對抗環境污染，抗氧、抗皺護膚功效更比綠茶高出兩倍。 喺香港認識茶靈嘅人唔多，所以品牌都好積極舉辦多次試用活動。小妹就係因為參加咗2017年嘅master class而愛上茶靈。當時喺希慎廣場仲未有鋪位，只有個pop-up store。 1小時嘅master class實情係mini facial section，小妹試齊咗卸妝油、潔面粉、蒸面茶片、面部精華、按摩霜、刮痧護理、面膜、眼部精華、遮瑕眼霜、保濕乳液、防曬霜咁多樣產品！ 活動後，小妹買咗keep住用到而家嘅Spring Mask 春季面膜(HK$1650/100ml；HK$910/50ml；HK$300/15ml旅行裝)。 實不相瞞，買完好後悔，因為85折咗都係好貴T^T。過咗幾個月，皮膚狀況壞到終於忍唔住開咗嚟用，敷完嗰下真係慶幸自己有買到。 睇下，係空瓶呀╮(╯▽╰)╭！ 成份：水 • 甘油 • 辛酸/癸酸甘油三酯 • 戊二醇 • 聚丙烯酸鈉澱粉 • 甜菜鹼 • 茶葉萃取 • 油茶籽油 • 棕櫚酸乙基己 • 泊洛沙姆407 • 丁二醇 • 黃原膠 • 甘油辛酸酯 • 苯氧乙醇 • 香料 • 燕麥仁萃取 • 羥基化卵磷脂 • 檸檬酸鈉 • 錦葵萃取 • 透明質酸鈉 • BHT • 積雪草葉萃取 • 三羥基硬脂酸甘油酯• 檸檬酸 • 焦糖 • 辛乙二醇 • 己二醇 • 生育酚 茶靈每樣產品都具抗氧化、抗衰老、排毒嘅功效，無分系列、無分適用年齡，而Spring Mask更可以滋潤皮膚、消炎舒緩、提升光澤——唔係喺官網quote出嚟，而係小妹呢半年嚟嘅用後感！ 小妹用嘅係50ml裝，因為太窮，唔想一次過花千幾蚊(╥﹏╥)。 呢度大概敷到20至25次吧，每星期2至3次，小妹唔捨得一次用咁多，啱啱好搽勻成面就算。 面膜掃係買mask附送嘅，有個布袋入住，不過小妹習慣就咁放出嚟風乾。 面膜呈米白色乳霜狀，健康皮膚搽上面會有冰涼嘅感覺，小妹呢啲問題皮膚喺個別位置會feel到㷫㷫哋，應該面膜養份正在發揮作用。 15分鐘後，好明顯見到面膜被皮膚吸收咗好多。 乾性皮膚可以用乾嘅化妝棉抹走多餘面膜，留返少少當面霜或者sleeping mask——係專門店職員教嘅。 至於小妹呢啲油性皮膚就必須過水啦。質地太豐盈太滑啦，要洗至少3分鐘先洗得哂——不過唔影響我喜歡用佢 XD。 睇到嗎睇到嗎？暗瘡四周嘅紅印範圍收細咗，下巴粒大瘡喺短短15分鐘內熟咗、出埋膿頭，代表好快會謝啦(^o^)。 面頰同頸嘅膚色相比之下，整體減少泛紅，肉眼睇會即時亮白咗。 一覺瞓醒之後，就算未洗面，面色都算唔錯、唔暗沉。但係小妹習慣唔開冷氣瞓，半夜出哂汗，T字位已經無啱啱敷完mask咁清爽。 小妹又有側身瞓嘅習慣，塊面貼住枕頭——其實超級唔健康，不斷摩擦之下，面頰仲係好紅。 下巴部分暗瘡開始謝，但經過排毒又谷咗粒新嘅出嚟ಥ_ಥ。小妹寧願佢爆出嚟好過積聚體內嘅⋯⋯ Spring Mask唔係暗瘡面膜或者美白面膜，而最吸引之處係無用任何酸性物質就做到消炎、美白效果，唔會對皮膚造成刺激。 對於無嚴重暗瘡問題嘅朋友，可能效果唔會咁明顯——由紅變白，但Spring Mask原理同中藥相似，可以慢慢調理好皮膚，令皮膚健康——大家都知道喝茶對身體有益吧。 於小妹而言，Spring Mask係小妹最信賴嘅急救救星——比起前幾篇文介紹過嘅skincare，佢絕對係小妹最愛！生咗十幾年暗瘡，要痊癒唔係一朝一夕嘅事。但小妹用佢嘅話，完全唔需要擔心成日用酸性產品（去暗瘡產品通常含果酸、水楊酸等等）會唔會令皮膚缺水、敷得太密有無問題、做完激光脫毛敷佢會唔會刺激。 Spring Mask仲喺2017拎咗好具代表性嘅《Marie Claire》Prix d’Excellence de la Beauté 2018 國際美妝大獎──大中華特別獎（香港區本土大獎Best Eco Product）同《旭茉JESSICA》My Star-Rated Beauty Awards 2017 Anti-Pollution Mask獎項。 大家有時間，不妨直接走去茶靈話想即時試下Spring Mask。根據經驗，職員都好樂意，唔會逼到你購物先放你走。 下篇再介紹茶靈新品Summer Mask 夏季面膜(HK$600/50ml；HK$990/100ml；HK$195/15ml旅行裝)。 CHA LING 茶靈 官方網頁： https://www.cha-ling.com/hk_cn/ CHA LING 茶靈 Facebook專頁： https://www.facebook.com/CHALINGlespritduthe/ CHA LING 茶靈 Instagram： https://www.instagram.com/chaling.teacosmetics.hk 香港專門店 : 九龍海港城港威商場三階3306A號舖 電話 : 852 3101 0708 銅鑼灣希慎廣場二樓206號舖 電話 : 852 3126 9981 金鐘太古廣場 L2 101A 號鋪 電話 : 852 2155 9278 Beauty Lounge 隱舍 : 九龍海港城世界商業中心1015號室 ＊＊＊ 呢篇唔係邀稿
