小妹自問唔係化妝專家，只係為咗靚而略有研究。呢篇文唔係教人化妝，主要想分享幾款好用嘅產品。 由於暗瘡皮膚唔穩定，選擇化妝品要非常小心。雖然小妹都好希望妝容持久、貼薄、有光澤，但係首要條件係唔會刺激到啲瘡瘡(T ^ T)，同時夠實用。 小妹皮膚薄，容易泛紅，要用綠色primer減退紅印。初時平平哋買咗Etude House Fix and Fix Tone Up Primer(HK$118/30ml)，但佢質地太乾，用手搽完好似又捽紅返塊面(ｰ ｰ;)。 之後改用cushion，買咗LANEIGE 輕透啞緻調色Cushion霜SPF14 PA＋＋(HK$235/15g*2)至今8個月，可能少化妝啦，仲未開替芯。 佢嘅賣點嘅水潤、透薄，呢兩樣都做得唔錯。搽上面嗰下涼浸浸，有搽面霜嘅滋潤感，之後上乾粉都幾貼——但對於乾性皮膚夠唔夠保濕呢，小妹就唔知啦。 Cushion粉撲嘅顏色揀得好好，深藍同淺綠嘅對比令用家容易控制primer份量。 Cushion粉撲面積大，無法完全遮蓋所有瑕疵。要化高清妝，就要將調色乳同遮瑕液混合，用遮瑕掃上。 可惜佢嘅防曬度只有SPF14 PA＋＋，扣去唔少分數。如要進行戶外活動，必須另外搽防曬霜。 暫時仲未搵到暗瘡皮膚專用嘅調色primer，所以呢盒LANEIGE cushion只會喺無生大瘡嘅日子用。發炎比較厲害嘅日子，會改用普通防曬霜做primer。 茶靈 防護隔離霜SPF 50 PA＋＋＋(HK$370/30ml)係其中一款唔會刺激到暗瘡嘅防曬用品。但由於質地較豐盈，唔太建議油性皮膚用，只係見有所以用住先。 小妹超喜歡呢盒bareMinerals 礦物抗炎零毛孔粉底(HK250/6g)。BM嘅產品本身已經標榜唔卸妝都唔傷皮膚——雖然點都應該卸妝，礦物抗炎零毛孔系列更加專為暗瘡肌膚而設。粉底蘊含北美樺樹精華同茶樹油，可促進細胞更生、抗菌消炎、防止暗瘡粉刺問題惡化。 買咗02號色，同面、頸同色。 一星期用3-4次吧，每次搽1-2層，由1月用到6月，都未用哂一盒。 佢係粉狀粉底，可以用來化底妝，或者上完濕粉底後用來定妝。 呢款粉底有個專用嘅無痕順滑粉底掃(HK$240)，起初小妹感到非常肉赤(°_°)，後來覺得佢幾好用，啲毛毛唔會斷、唔會甩，幾耐用，搽粉底又唔會卦親塊面。 一般用法係由鼻樑向上向外將粉底推開，但當上一層防曬霜、primer或濕粉未乾透，用「印」嘅手法就無咁易整花之前搽嘅嘢。 BA話，街上佈滿各種污染物，皮膚脆弱嘅日子，粉底反而成為保護屏障。小妹用咗接近半年，的確無因為化妝而爆瘡。 小妹自知自己多瘡印和凹凸洞，好難化到零瑕肌，而呢盒粉底正正畀到我理想效果——妝感自然、均勻膚色。購買當日，在場友人都話近睇唔似有化妝。 瑕疵太多，小妹基本上已經放棄治療(-｡-;。再者，暗瘡上再搽遮瑕膏，更有機會引致發炎。 因此，小妹會用遮瑕掃重點上粉底，當遮瑕粉用。反正佢有消炎作用，可以放心用喺暗瘡、暗粒位。 效果都可接受。 可以將暗瘡紅印變得更接近膚色，不過始終突起咗，唔會完全遮哂。人中位置個印就遮得好少少。 粉底嘅缺點係唔防曬、唔保濕。小妹面上較缺水嘅位置如眉心、眼周明顯卡粉(｡ ́︿ ̀｡)。 要另外買遮瑕產品遮黑眼圈。小妹見美容達人倪晨曦每次拍化妝片都用呢支NARS 光亮柔滑遮瑕膏(HK$290/6ml)，小妹都跟住入咗手。 只用嚟遮黑眼圈，Light 2.5號色同膚色相同，唔補粉底都可以見人。 先點少少喺眼肚位置——唔好太近下眼線，否則會顯得細眼，然後用無名指肚按勻——千祈唔好推！ 真係遮得好好！仲無卡粉添！妝效持久。 跟住到定妝部分。 小妹同好多朋友一向對Innisfree產品無咩好感，唯有對控油礦物質散粉(HK$54/5g)另眼相看。佢口碑、性價比都比不錯，非常建議化妝新手購買。 佢係白色粉狀，搽上面係無色嘅。用粉撲沾上後，都要捽散佢先好拍上面，咁會貼啲、均勻啲。 礦物粉係天然物質，基本上唔會對皮膚造成傷害。 佢嘅控油功效甚佳，一整日留喺室內嘅話，過咗大半日仍可以保持面部乾爽——當然同用量有關，T字位可以搽多啲。戶外活動就差啲，因為佢唔防汗，要補粉。 最後，畫埋眉、搽埋唇膏，小妹嘅日常妝容就完成啦。 老實講，若要追求持久、無瑕嘅妝容，以上化妝品完全唔及格。 作為多年受暗瘡問題困擾嘅後生女，小妹學會咗接受自己嘅弱點。何必同天生皮膚好嘅人比較呢？就算自己皮膚唔好，都總有美嘅一面。塗上厚厚遮瑕膏，用層層面具掩飾，豈不是讓人看穿自己有幾自卑嗎？ 只要令自己睇起嚟精神啲、有血色、乾淨、清秀，就能散發自信！ 再向大家推介內地人氣blogger大佬甜er嘅《痘肌瑕疵皮夏日換臉術》，簡直神乎其技(●°u°●) 」，不過小妹無咁好心機日日換臉啦 XD。 https://youtu.be/ccyD2IQiAh8 ＊＊＊ 呢篇唔係邀稿
