上星期去完杭州,回港後,漸漸好轉嘅皮膚忽然又再火山爆發(╥﹏╥)。 早排喺網上見到CO2面膜嘅宣傳好勁,話佢有神奇功效,可以保濕、美白、抗皺、抗氧、刺激細胞生長⋯⋯仲會幫助傷口癒合,穩定發炎、暗瘡皮膚! 市面上嘅CO2面膜有好多款,好多係唔太熟悉嘅日、韓牌子。反而鉑のMask嘅白金CO2面膜口碑較好,較多人認識,連Mi Ming Mart都有賣,咁應該真係唔錯~ 小妹心思思想試好耐,不過佢比較貴(HK$199/3包;HK$320/5包),一直唔捨得,而家無法了⋯⋯ 趁住做緊85折,買咗3包裝嚟試下。 每包附有一張教你點用嘅卡仔。呢個設計好,就算丟咗個盒,或者想送一包畀人用,都可以輕易了解使用步驟。 起初有啲驚會擠爆個袋,其實唔會,因為個邊夠粗。 中間條界好薄,用少少力就可以將其中一邊嘅液體擠去另一邊。 當兩種液體混合,就有好多泡泡彈出來,個袋畀氣體充脹,有啲暖暖哋。 撕開膠袋嗰下,泡泡開始消失,餘溫漸退。小妹用最快速度將面膜搽上面。都幾難搽,因為佢比一般啫喱面膜重,又係semi-solid,容易散開一舊舊同跌落嚟,所以動作要快。好彩面膜份量夠多,搽勻全面仲有剩。 呢個面膜要敷30分鐘。起初覺得塊面好free,好似乜都無搽咁。到咗第20分鐘,會feel到面膜慢慢凝結,有些微拉扯感。 夠鐘啦!到咗最好玩嘅時刻——面膜變成啫喱糖嘅質地,可以成塊撕落嚟啦o(≧v≦)o! 好方便,唔需要過水。如果撕唔乾淨,輕輕用指尖捽下,就可以清走。 至於有無效呢⋯⋯ 額頭、眼底呢啲「好肉」係有光澤咗嘅,而且覺得好滋潤。 但係對小妹面珠同下巴嘅大暗瘡係完!全!無!幫!助!發緊炎嘅地方依舊發炎;下巴粒暗瘡仲流緊血水⋯⋯ 啲blogger同藝人話初時用可以日日敷,大概敷5次就可以每星期2至3次。好,等小妹都連續敷哂3包。 第2日敷完,面頰唔單止無消炎,下巴仲標咗粒新嘅⋯⋯ 第3日,小妹決定改變策略,先敷返Goldi 約旦死海礦物泥排毒桑拿面膜,然後再用白金CO2面膜。 一覺瞓醒,下巴啲瘡終於消炎啦!!! 接落幾嘅幾日,其他暗瘡都慢慢謝哂。 結論:鉑のMask 白金CO2面膜都係留返無生暗瘡嘅時候用來保濕、美白、抗衰老吧。 鉑のMask 官方網頁: https://www.ptmask.com 鉑のMask Facebook專頁: https://m.facebook.com/platinum.mask 白金CO2面膜 售點: https://www.ptmask.com/store-location?gclid=EAIaIQobChMIqaKu7Kbs2wIVFoiPCh1K_A3vEAAYASACEgI4SfD_BwE *** 呢篇唔係邀稿