「空瓶記」終於來了！小妹已經用緊第2樽——佢就係Goldi 約旦死海礦物泥排毒桑拿面膜 Dry Sauna Mask (HK$328/30ml)。 Goldi係獲以色列衛生局認可嘅護膚品牌，小妹以前都未聽過，但對死海泥就一啲都唔陌生，聽聞佢有抗衰老、排毒等神奇功效——只不過，通常都好貴( ･᷄ὢ･᷅ )。 3月嘅時候，小妹畀Facebook呢張相draw咗attention⋯⋯居然有咁神奇嘅清潔面膜？！ 佢嘅賣點係會發熱，好似焗桑拿咁，令毛孔擴張，而入面嘅獨特成份——沸石(Zoelite)成分——會將皮膚底層嘅油脂、化妝品殘留物、重金屬等污垢吸走。敷2、3分鐘就夠，好方便。 小妹以前都用過發熱面膜，唔膽心敏感，只要對付到暗瘡凹凸洞同痘印，就必定大感興趣！原價每樽HK$328，(長期)特價HK$285，包順豐站自取或者工商地區送貨。嘩！買6樽仲有近乎半價嘅批發價。嘩！！！ 有睇開小妹文章嘅朋友應該記得當時小妹已經買咗PURE Acne SOS Mask，消滅暗瘡效果唔錯。與此同時，用開嘅深層清潔面膜差唔多用完⋯⋯結果狠狠買了6樽╮(╯▽╰)╭。 真係好似賭錢咁。博一舖。 呢批面膜2019年2月到期，有啲擔心用唔哂，於是送咗2樽畀朋友o(^▽^)o。 小妹會視乎皮膚狀況，隔2至4日用一次。如果嗰排日日長時間出街或者需要化妝，就敷密啲；如果谷暗瘡，就厚敷喺嗰個位。30ml面膜咁用法，都夠用2個月，性價比唔錯。 全新係滿嘅，呢樽已經用咗幾次。 佢質地好得意，唔係cream，又唔係泥，似磨砂膏，入面有啲一粒粒，但其實唔係磨砂粒子，而係死海海鹽，之後會溶哂。掂落手指嗰下，已經開始有微溫。 小妹喜歡喺沖涼嘅時候敷深層清潔面膜，因為浴室內嘅蒸氣會令毛孔擴張，從而排走毒素。沖涼前搽上面，差唔多沖完就洗得。 由於面膜含有豐富礦物質，亞洲肌膚未必適應，使用初期可能會有啲唔舒服。小妹第一次用feel到痕痕地，用多幾次就正常返。如果嗰排皮膚狀態差，有傷口嘅位置都會有畀嘢吉嘅感覺。 面膜入面仲有大量礦物油，摸落去滑潺潺，有滋潤功效，敷完唔會好乾或者掹掹緊。不過，敷完啲熱嘅嘢喺面，皮膚難免會泛紅，極度建議各位即刻敷完個保濕mask舒緩下。 太滑啦，用手捽嘅話，洗到天光都未洗完⋯⋯ 小妹會利用花灑水嘅沖力洗走面膜，唔需要開到好大，因為水有重量。但記住唔好用熱水呀！！！ 睇住面膜泥好似豆腐渣咁跌哂落嚟真係好治癒♪( ´▽｀)。完全唔需要用手，就可以快速同溫和咁洗走面膜。有時用手捽，可能反而會擦損啲暗瘡ಥ_ಥ。 睇返3個月前影嘅暗瘡相，再對比下而家，原來皮膚改善咗咁多，好滾動T_T，相信呢個mask嘅功勞唔細。 購買傳送門： https://www.debeautehk.com/products/goldi-sauna-mask ＊＊＊ 呢篇唔係邀稿
