為咗尋求解決皮膚問題嘅方法,小妹一向勇於試唔同product,反正已經不能再差啦係咪?今次好開心喺U Beauty抽到試用VPROVE 朴寶劍水凝膠面膜(HK$198/10片)。條款無話用完要分享用後感,不過呢款面膜實在太新奇,忍唔住想同大家報告下! VPROVE由韓國進駐香港唔夠一年,相信好多人對佢依然陌生。小妹喺VPROVE官網搵到呢段文字: //我們深知肌膚問題會增加您的心理壓力與苦惱, 所以VPROVE用科學和皮膚專學知識作為基礎, 為各人皮膚因各種刺激而變得敏感的時候,提供各種能有效解決肌膚問題的方案。VPROVE採用了不刺激肌膚的柔和配方,通過多次測試並進行驗證,提供可以呵護身心健康的細緻護理。// 佢哋產品大概以溫和配方、舒緩保濕為主吧,睇嚟幾適合小妹容易泛紅嘅肌膚。 一盒有10片,共5款,包括薰衣草、金縷梅水、蘆薈、茉莉花、迷迭香,每款2片,小妹已經試齊哂。 平時用嘅片裝面膜最多係紙呀、膠原呀、纖維呀,就係從未見過一款面膜係咁「膠」!!!(圖片來自VPROVE官網) 面膜分上下2片,精華量如圖。 面膜完全透明,約1mm厚,精華黏附喺凝膠,唔會滴到四圍都係。 質地似啫喱糖,摸上手啜啜哋,有彈性得嚟都容易扯爛,打開時要輕手啲。 眼同嘴位嗰3塊拎落嚟可以敷喺面膜覆蓋唔到係位置。 由於面膜密度好高,幾乎唔透氣,造成真空狀態,可以完全貼喺臉上,點喐都唔跌唔移位。睇下小妹眉毛同額頭嘅毛髮,壓扁哂(。・ω・。)。神奇嘅係,皮膚並無抖唔到氣嘅感覺啵。 但係覆蓋範圍略嫌不足,照顧唔到下巴同腮邊肌膚。 10分鐘後除下面膜,精華已被完全吸收,畀大家睇真啲膠面膜係咩樣先~ 可能本身面膜嘅精華唔多啦,皮膚都唔會濕笠笠,唔需要好似平時咁「慢慢按摩直至精華完全吸收」。肉眼睇落乜都無,用手一摸,就會feel到一層薄膜蓋喺皮膚上,好似搽完面霜咁。 試哂咁多款之後,小妹覺得金縷梅水面膜最有驚喜。金縷梅本身有鎮靜清涼功效,非常適合敏感皮膚。話說有一晚,小妹畀隻蚊針咗成晚,瞓醒之後個鼻又紅又痕,面頰有蚊赧(>_<)。敷上一陣,就feel到涼浸浸好舒服;敷完10分鐘,已經唔再痕癢,皮膚褪咗紅,蚊赧消咗腫。 蘆薈面膜作用係深度持久保濕,特別適合乾性皮膚。小妹認為佢的確係5款之中最保濕嘅,可惜香料味重,又唔似蘆薈味,即使皮膚唔敏感,嗅覺都有機會敏感⋯⋯ 茉莉花面膜可締造輕透和亮白肌膚,同時帶來優雅的香味——但似乎只可為健康皮膚錦上添花。近來小妹皮膚經常乾到痕,敷咗佢反而越來越痕,一啲都唔保濕,第二朝起身繼續痕( ̄◇ ̄;)。 迷迭香面膜聲稱可使皮膚充滿活力、健康潤澤、光彩照人。小妹係喺敷完茉莉花第二朝繼續乾到痕嘅時候使用,敷完無錯係即時舒緩咗,不過3小時後化妝一樣kick粉⋯⋯ 過咗幾日,小妹等皮膚無咁乾之後,再試埋最後一款薰衣草面膜。佢嘅香味最清淡自然,敷嗰陣幾舒服,可惜未能舒緩鼻頭嘅乾性痕癢,都係要靠重點搽保濕面霜。 總括而言,VPROVE朴寶劍水凝膠面膜香料味偏濃,貼面透氣卻保濕效果一般,一盒HK$198太貴——如果只係金縷梅水面膜就好值!大家不妨散買幾片看門口,蚊叮蟲咬後急救真心正( ´ ▽ ` )ノ! VPROVE 官方網頁: http://www.vprove.com.hk/zh-hant/home/ VPROVE Facebook專頁: https://www.facebook.com/vprovehk/ 銷售點: HKTV mall、指點 Finger Shopping、ZALORA、萬寧 *** 呢篇唔係邀稿