相信好多人都知道，爽膚水除咗用於潔面最後一個步驟，仲可以濕敷急救。化妝棉只可以cover到部分皮膚，太唔方便啦，於是有人發明咗「壓縮面膜紙」。 小妹想買好耐，卓悅都有賣，但一來唔知係咩牌子，二來包裝上咩資料都無，真係唔敢亂買。 日本粧藥又平又有口碑。最近有朋友飛日本，小妹托佢買咗2包DAISO嘅壓縮面膜紙返來！小妹稱佢哋為10粒裝同15粒裝。 本來想買35粒裝嗰款，但無貨，佢就買咗呢2款——估唔到同一牌子都有咁多選擇。 小妹梗係要同大家分享下2款嘅特點同分別啦。 DAISO係日本嘅人氣100円店——就好似香港嘅12蚊店，大部分貨品只賣100円。呢2包面膜紙連稅都係108円，即係HK$8左右。 價錢回合，15粒裝勝！ 10粒裝係密封獨立包裝，外包裝仲係保鮮袋設計，具雙重保護，更標明有效日期。 15粒裝係全部放喺同一個膠袋，只有黏貼封口，長期同空氣接觸，又唔知可以放幾耐。 衛生回合，10粒裝勝！ 10粒裝由100%紙漿(pulp)製成；15粒裝係棉製，但唔知係咪100%同埋有機。 小妹上網搵咗啲有關面膜材質嘅資料，似乎紙漿製嘅10粒裝較優勝。 小妹用HABA G-Lotion(HK$260/180ml) 7ml試用裝來進行測試，咁啱夠一次濕敷份量——但今次只會評論面膜紙。 先試15粒裝。 將G-Lotion倒入量杯後，4秒左右就滲到一滴不漏。 打開佢嗰陣，有一股膠膠地嘅怪味——係LuLuLun化妝水面膜都有嘅味！敷上面嗰刻已經散去。 DIY面膜當然無市面上買到嘅化妝水面膜咁濕潤，不過就出奇地貼面，點講嘢都唔甩唔移位，滋潤感同用化妝棉相近。 剪裁比想像中好，size夠大，可以cover到腮骨同整個額頭。DAISO好細心咁加咗塊「眼膜」敷埋眼皮，但係完全無用 XD，根本黐唔實，倒不如正正常常加喺眼袋位啦╮(╯▽╰)╭。 千祈唔好敷到張紙乾哂，否則皮膚會被倒抽水份。雖然包裝上話敷10分鐘，但5分鐘較為穩陣。除下之後，擠壓之下仲剩返少少G-Lotion滲出嚟。 然後即刻試埋10粒裝。 佢同15粒裝嘅直徑相約，但比後者厚；同樣用咗4秒就吸哂所有G-Lotion。 佢無15粒裝嘅「膠味」。 佢比15粒裝大張好多，或者7ml太少啦，面膜紙嘅濕度唔足以佢緊貼肌膚，仲浮過敷完嘅面膜(-｡-;。 至於cutting，認真嚇死人！面膜可以敷埋頸；面、頸部份兩測各有1個圈套住耳仔，即係每隻耳仔有2個圈套住——實在太多餘！若面膜紙夠貼面，又使乜要個圈來固定位置？ 佢本身亦唔夠長套哂兩邊耳仔⋯⋯ 原來包裝上寫著嘅「Over-Ear」係咁解，創新都唔一定好ಠ_ಠ。 幾經辛苦，勉強套哂4個圈，只係小妹條頸⋯⋯就⋯嚟⋯斷⋯⋯啦⋯⋯ 影完相，除都除唔切。畀大家睇清楚啲先。 世事實在太多出人意外嘅事物，大家切忌以貌取物。唔使小妹總結，都應該知道邊款先至買得過吧～ ＊＊＊ 呢篇唔係邀稿 ＊＊＊ cafchiu@gmail.com https://www.instagram.com/happychiu/
