歷時 12 小時到達瑞士蘇黎世,再轉火車去巴塞爾 (Basel) ... 一個細小嘅城市,未嚟過,所以 stay 一日行吓,佢最出名應該係每年嘅錶展,可惜我哋去到時啱啱完咗,哈哈 ... 咁就睇下其他嘢啦!對瑞士既愛且恨,愛既係佢嘅風景 ... 當然山區更靚,恨嘅係佢消費堅高,所以有兩餐都係超市解決,計起上嚟比餐廳嘅平! 一落機,即刻要攞番件羽絨出嚟先,得幾度 ... 好凍呀!買火車飛並唔複雜,只係想用銀聯卡而用唔到,唔知大家又有無試過喺外地,想用銀聯而唔得呢?呢個問題真係唔知幾時先可以解決呢 ... 香港出嘅銀聯卡係無 pin ,但係外地永遠你係要入 pin,此 pin 並唔係你櫃員機嗰個 password,好多人誤會咗,4 個位或 6 個位嘅 0 我都試過,有得有唔得,永遠唔知幾時得,真係煩到一個點,外地嘅收銀有時亦會顯得唔耐煩,所以我都唔會到到試,銀聯時有 promote,咁但係用唔到,promote 嚟係咩意義呢? 大約一個鐘鬆啲就到巴塞爾喇 ... 晨早流流 1000 就嚟到,先去酒店放低行李,今日 book 咗都算近同方便嘅住宿 宜必思巴塞爾班霍夫酒店 (ibis Basel Bahnhof Hotel) 商務酒店一間,貪佢近火車站,門口有電車,而價錢算相宜,因為近火車站嘅酒店都係比較貴,租呢到嘅酒店最好處就係一人包一張 Basel Card 可以兩日內任搭市內嘅交通,而有啲景點同 hop-on-hop-off 巴士會有 discount,不過我哋無去特別要比錢嘅點,齋搭車都已經好正,行都攰又上車坐下! 未可以入房住,先去吃個早餐先,其實唔係太肚餓,只係搵個地方坐下咁,網上見到呢間餐廳評價唔錯,就試下啦 ... Spark 嚟到先知其實佢係葡萄牙嘅 style,所以晨早就有葡撻食,叫咗 2 個 All Day Breakfast,係包一件 ham & cheese 三文治,一個葡撻,一杯橙汁,再有 coffee or tea,其中一份加咗個 extra ... 嚟到先知係腸炒蛋,麵包同一杯 champagne,好彩只係 order 咗兩份,唔係一定食唔哂,哈哈 ... 嘢食唔錯嘅,杯 cappuccino 就一般喇,個人覺得唔夠味,件三文治用西班牙火腿,好味,不過只食半件已夠,而橙汁係鮮榨,即叫即榨,正! 早餐後附近逛逛,行下超市咁,時間差唔多就番去酒店入房!搞掂哂啲行李就搭車開始旅程,呢到其實真係唔大,行路都可以,不過有 free,無奶油唔搭車㗎,哈哈 ... 聖以利沙伯堂 (Offene Kirche Elisabethen) ~ 市中心嘅一座教堂,毗鄰巴塞爾劇院,係瑞士最著名嘅新哥德式建築物。佢嘅鐘樓高達 72 米,超過巴塞爾大教堂,可以登塔。瑞士宗教改革之後巴塞爾興建嘅第一座教堂,於 1857–1864 年,由富有嘅商人克里斯多福·梅里安夫婦興建,而佢哋都安葬喺教堂地下室嘅黑色大理石棺材裡面。 天氣超正!嚟前睇天氣,係咁話會有雨,當然都知道啲天氣 app 係唔準嘅,好彩真係唔準,哈哈 ... 巴塞爾主教座堂 (Basler Munster) ~ 巴塞爾嘅主要地標,係一座紅色砂岩建築,彩色屋瓦,兩個小塔,主屋頂十字型交叉,而你個教座堂係列入咗瑞士國家遺產名單。 ♦ 教堂外有個伯伯玩泡泡,吸引咗好多小朋友 ♦ ♥ 呢條就係嚟緊會遊嘅萊茵河喇 ♥ 市內閒逛,紅色嗰間係市政廳,喺前面每朝都有個市集,不過我哋下晝先去,所以已經收咗! 因有啲時差嘅關系,成個人渾渾噩噩咁,所以是日晚餐就係喺是但喺超市解決咗,返到酒店即刻瞓著,哈哈 ......