開始行程前，先介紹下隻河船先，唔知係咪好少香港人去呢類河船，還是全部老餅去呢，哈哈 ... 所以網上無乜人題及呢啲行情，希望可以比大家參考下啦！ 上郵輪係嚴謹好多，要 scan 你嘅所有行李，唔比帶啲利器，飲品亦不能，相對河船就寬鬆好多，無人理你帶乜，當然都唔好帶危險品啦，你自己條命仔都喺到家嘛！ ♥ 船嘅外貌，都幾長㗎 ♥ 上船嘅地方，河船並唔似郵輪咁有啲好大嘅泊岸碼頭，全部都係咁樣泊岸邊，搭條橋就上岸，當然係好安全嘅，不過搬行李嘅時間就會麻煩小小，但啲船員係會幫你嘅，唔洗擔心，記得綁好佢比你嘅行李帶而寫好房號就 ok 㗎喇！ 房間比想象中大同靚，感覺好好，我哋揀嘅呢隻叫 「法式露台房」唔知係咪法國啲屋嘅露台係咁設計，而叫一個咁嘅名，有機會去法國望下先！喺床邊棟門係個小小嘅衣帽間，非常愛呢個位，因為可以將咁多日用嘅嘢放哂出嚟，好正呀！洗手間都唔錯靚㗎，用品原來係荷蘭嘅品牌 Rituals 不過我都只係用咗 body shampoo，無用其他。 行下船艙先，其實唔太大，除咗啲必要嘅地方設施，我估 80% 係房間，剩餘嘅空間唔係太多 ... 下面呢間係閱讀室，其實係可以坐喺到飲下咖啡，傾吓計咁嘅，不過呢啲又唔係我哋嘅 style，我哋只係喺到食過 KFC，容後再談，哈哈 ... Coffee or Tea 係全日任斟嘅，Anytime 都可以享用，仲有啲 cookies 都幾好味㗎喎，我哋都食咗好多，另外仲可以做 SPA 同有 Saloon 剪頭髮嘅，我哋當然無幫襯過啦，嘻嘻 ... 除咗餐廳，最多嘅活動就係喺 Panorama Bar，呢到有早 ·午輕食可以揀，早餐就無試過，Lunch 就 ok 嘅，小型 buffet 同有 pasta 食，因為主餐廳係無 pasta 嘅，可以叫轉下口味咁！ ◊ 一上船食個 tea 先，三文治 + 果撻，好味唔錯，不過當食多幾餐就 ... ◊ 最後就介紹下夾板啦，喺上面都幾舒服㗎，不過我去時都仲係幾凍下，所以都幾大風，天氣算係好好，都有間唔時上去行下，有啲西人遊戲可以玩，不過我哋就唔識玩喇，只係坐下，曬下太陽咁！
