入黎睇下我哋個Blog嘅介紹啦~! >HamBlogger< 香港人生活壓力大，唔知大家有想試下停下腳步，放空一下呢？如果有既話，大家可以黎到位於荃灣中染廣場嘅【Backyard】。【Backyard】顧名思意即「後花園」，呢間走中檔路線嘅西餐廳佈置到成個花園咁，猶如置身係樹林當中。 入到去之後發現無乜人，唔洗同人迫，係世外桃園！ 一位溫文爾雅嘅職員帶我地去到窗邊卡位坐底，座椅闊落，好舒服。點完餐之後，服務員先奉上麵飽籃同一小碟橄欖油黑醋。籃內分別有提子包、黑芝麻飽，同餅乾條。提子包身軟熟又熱辣辣，唔錯！餅乾脆卜卜，非常有口感。而黑芝麻包就較為普通，無芝麻香之如口感仲比較嚡。 P.S. 小編唔知道原來黑醋係配包食嫁，仲以為係沙律用，到食哂啲包先知 食完餐包後，首先上既係凱薩沙律+煙三文魚 ($68+25)。煙三文魚嘅份量比起其他鋪頭算多，而個沙津係超好味！！先唔講佢地所選用嘅生菜係甜嘅(從來未試過出面食沙律D生菜係甜嫁！)，沙律醬嘅分量係落得岩岩好，唔會過多，但又岩岩好每一塊生菜都均勻咁沾滿汁。除此之外，沙律落左足夠嘅芝士絲，食落有少少咸香。而啲煙肉同面包粒微真係粒黎，唔會細粒到好似碎咁。新鮮清脆的生菜葉片，咬下咖滋有聲，再加上鬆脆既面包看，配以沙律醬，真係令人食指大動。 沙律係物有所值！ 主食揀咗軟殼蟹泡菜竹炭漢堡配薯條($128)，份量比想像中大。第一眼望到嘅就係大過手掌嘅軟殼蟹，蟹厚身且有肉感，又有蟹膏，加上唔會炸得太勁，都唔錯。包入面有好多料，有生菜、泡菜、蕃茄、牛油果醬，包上面仲有半條酸瓜(開頭以為有海參係包上面)。雖然個包嘅餡好豐富，可惜個味道並唔討好。泡菜味基本上掩蓋哂其它食材嘅味道。再者，泡菜太多水，一路食啲泡菜水一路滴哂落枱面，跟本就同軟殼蟹唔夾。最後，小編係要將佢地分開一層層食。 雖然個包麻麻，但不得不提嘅係，個薯條令人十分驚喜！薯條粗身，內脆外軟，仲要係連薯皮㗎! 中間軟綿綿嘅口感令人食唔停口，重點係佢炸得岩岩好，食落唔會覺得好油膩，調味又唔會太咸。值得一讚！ 如果10分係滿分，薯條我會畀11分 小編同朋友另外再叫咗個三文魚帶子意大利飯($208)，上面2粒帶子個樣靚到呢…好似叫緊人快啲食佢咁樣！Risotto嘅汁係蕃茄味，味道濃郁，口感creamy。但如果以呢個價錢嚟講，我諗唔會再叫第二次。 雖然個薯條真係好食到食上癮，但個包就令人失望。軟殼殼同泡菜嘅配搭不倫不類，創意十足，但味道確實一般。雖然個包麻麻地，但係餐廳嘅環境佈置同埋員工態度都非常好。由一入餐廳開始就有人帶位，又會有專人服侍。當我地食完沙律收走碗碟後，先再奉上正餐，成個用餐過程愉快又寫意。希望呢篇食評可以幫助到大家搵到屬於自己嘅後花園啦！ P.S. 3號小編食食下飯同友人討論百摺簾嘅英文係乜(唔好問點解食飯講呢啲)，點知係我地R哂頭嘅時刻有位文質彬彬嘅waiter行過黎，話比我地聽百摺簾係「blind」。OMG！超好人！係男神阿！！ 推介： ★ ★ ★ ☆ ☆ 價錢： ★ ★ ★ ☆ ☆ 視覺享受： ★ ★ ★ ★ ☆ 口感： ★ ★ ☆ ☆ ☆ 環境： ★ ★ ★ ★ ★ 等候時間： ★ ★ ★ ★ ★ 店名: Backyard 地址: 荃灣青山公路荃灣段388號中國染廠大廈地下G1號舖 營業時間:星期一至日 08:30-22:00 撰文:三號小編-肥恩
