入黎睇下我哋個Blog嘅介紹啦~! >HamBlogger< 小編有日突發其想，起度諗…食Burger一定係貴㗎咩？哈哈，如果你嘅答案係：梗係貴啦咁，除咗M記包，唔係以為廿蚊就食倒吓話～Well…咁閣下實在有所不知啦！真係俾我發現倒廿蚊有找嘅港味漢堡。你無睇錯，係廿蚊有找，廿蚊有找，廿蚊有找！！！ 正所謂，沒有最抵只有更抵。一睇就知，呢一間快餐店有好多年歷史啦！香港今時今日呢種餐廳已經買少見少，咁都俾小編搵倒，算係好彩嚕～ 睇一睇舖面，見倒啲裝修可能會覺得：嘩！咁舊嘅會唔會中伏㗎？小編在此答你：你唔入去就一定走寶了！凡事都唔好淨係睇表面，可能會有驚喜嘅事情發生㗎！ 一入到舖嘅門口就有個好nice嘅姐姐同我地介紹吓呢度嘅招牌特色burger，仲特登講解咗啲食物係即叫即整㗎！再者，迄立左幾十年，但價錢都堅持以平價益街坊㗎！ 呢個就係鼎鼎大名嘅招牌沙嗲牛肉漢堡（＄16），小編係生平第一次食啲咁有本土特色嘅包 真心有驚喜！啲沙嗲牛肉好好食，加上係牛筋位，食落都幾有嚼口㗎！但美中不足嘅地方係個包可以烘耐少少，唔夠脆，同埋包底吸咗啲油，令到個包中間位有點稔 另外呢個流心芝士豬扒漢堡($22)就勁啦！啲芝士未切已經爆發梗！！！加上豬扒上下都有沙津醬，簡直係抵食到爛！正當我想切開個包嘅時候，老板娘好似識讀心術咁拎咗把刀入嚟俾我地！十萬個細心 切開嘅時候見倒啲cheese熔岩咁流出，唔小心叫咗出聲♥♥♥相比起上個包，呢個個包烘得岩岩好！加上個豬扒係新鮮炸起嘅，外脆內juicy，口感簡直係一流！重點係價錢貼地，廿二蚊就有得食，服務態度又好，試問邊度仲會有！！！ 除此之外，小編仲叫咗個下午茶，炸雞翼薯條連餐飲（＄24）。啲雞翼係用瑞士雞翼炸㗎，雖然感覺上有點怪怪的，但食落又有另一番滋味㗎喎！而薯條呢面頭就有啲pepper，比起用鹽有風味得多！ 點擊圖片放大 +2 講起個環境，小編們本身疊埋心水以為要坐起街邊好地道咁食啦，點知老板娘話有個VIP房，仲誠意邀請我地去坐。個地方尚算乾淨，食食下可能會有一兩隻小小嘅蚊滋仔突襲嘢食。但都無阻我地對美食嘅熱誠！！VIP房裏面仲有電視機添！唔洗驚悶親㗎！ 店名: 利口福快餐店 地址: 太子界限街43號恆富大廈地下1號舖（港鐵太子站 E 出口, 步行約3分鐘） 電話號碼: 27779006 推介：★ ★ ★ ★ ☆ 價錢：★ ★ ★ ★ ★ 視覺享受： ★ ★ ★ ☆ ☆ 口感： ★ ★ ★ ★ ☆ 環境： ★ ★ ★ ☆ ☆ 等候時間： ★ ★ ★ ★ ★ 此文章由二號小編李冰冰撰寫
