入黎睇下我哋個Blog嘅介紹啦~! >HamBlogger< 香港地有得食bagel嘅地方始終唔多，雖則著名美國餐廳老麥已經早喺幾個月前就加入Bagel早餐，但老麥始終都只係老麥，要細味Bagel梗係要搵啲有地道風味嘅舖頭先得啦！ 鰂魚涌呢間Yo Bago主要係整加拿大風味嘅Bagel，佢哋早喺一兩年前就已經打響咗名堂，小編今次就去咗試下佢哋嘅特色Bagel！ 小編去嘅時候咁啱撞正附近寫字樓嘅放飯時間，所以成間舖好多人好full 舖頭唔大，但勝在好有格調，入面掛滿哂加拿大特色嘅裝飾，連加國國旗都有！ 由於實在太多人，而小編亦住得好近，所以小編最後決定買外賣返屋企慢慢食！ 佢哋個Menu好有趣！佢係用左加拿大嘅地圖做背景，然後指出邊幾個地方有特色嘅Bagel！最犀利嘅係，佢哋有成16款唔同特色嘅Bagel，然後揀啱每款Bagel嘅餡之後，更加可以自己再揀要邊一隻Bagel嘅包！ 唔鐘意食有肉餡嘅嘅朋友，仲可以揀食簡單少少嘅Cream Cheese Bagel，都有好多款比你慢慢揀！ 老實講落單嗰陣睇到小編有啲眼花，因為真係有好多選擇！ 除咗個包之外，加大概$18 – $23就可以配餐，入面有沙律呀，湯呀，嘢飲呀乜乜乜嗰啲都有！ 就係咁樣，小編就買咗返去食… 打開個袋嘅時候小編忍唔住笑咗聲，因為兩個包都係用左個類似裝年糕嘅膠兜裝住，好搞笑。 仲有原本Bagel中間空左嗰個窿竟然有粒車厘茄填返滿，好得意！ 小編今次叫左嘅係Menu上面推介嘅Vancouver Breakfast (右) 同埋Calgary Breakfast (左) 。 註: 由於小編有揀到Bagel個包，所以同佢Menu上面嗰款Bagel原本個包係唔同的！ Vancouver Breakfast ($48) with Ten Cereal Bagel 小編買呢個包嘅時候有問吓店主邊一隻Bagel包會比較好味同健康，店主就推薦咗呢隻十榖Bagel包畀小編，果然冇介紹錯！個Bagel包本身都好黏䵑同好鬆軟，加上十穀，口感非常好。 小編初頭咬左一兩啖之後先發現左一陣陣滑芝士香原來Bagel包嘅後面仲搽左一層厚厚哋嘅Cream Cheese！食落個口感好軟滑，令個Bagel食起嚟更加有層次！ 個Bagel入面仲有煙三文魚、菠蘿、蕃茄、菜、青瓜等。菠蘿同煙三文魚中間仲有啲黑椒，食落幾惹味。雖然有芝士，但因為個包有唔少蔬類，食落個口感一啲都唔覺得膩，反而覺得幾Fresh幾健康。順帶一提，啲配料都幾多，除咗菠蘿之外，其他都至少有四片以上，好足料！ Calgary Breakfast ($48) with Plain Bagel 因為個包大過個盒，所以個包被個盒壓到變變哋形哈哈哈。個Bagel包嘅味道同正常漢堡包嘅包冇乜分別，但真係比坊間嘅較為軟熟。 呢個Bagel包後面搽嘅唔再係Cream Cheese，而係少少牛油，食落冇乜特別。 個Bagel入面仲有燒牛肉片、芝士、蕃茄、青瓜、煎蛋等。值得一提嘅係個Bagel嘅芝士同燒牛肉。嗰幾塊牛肉同芝士夾埋一齊好夾！啲牛肉比平時一般坊間食到嘅較鹹同埋較實，不過夾埋啲蔬類一齊食就唔會話太鹹，整體嚟講都唔錯。 總括嚟講，呢兩個Bagel都幾好食，尤其係主打嘅Vancouver Breakfast，但始終小編覺得價錢方面性質比唔係太高，不過厚道啲講個價錢如果係target附近一眾高級寫字樓的話都合理嘅。除此之外，小編買嘢食嗰陣老闆都好有耐性咁介紹，又好好禮貌，所以對呢間食店嘅感覺非常良好！ 如果去食的話，小編建議唔好喺啲放飯嘅高峰期去食，因為附近有太多寫字樓，撞正放飯時間的話真係會冇位！買外賣嘅話其實都唔算耐，10分鐘左右就有，但小編覺得有個幾嚴重嘅問題，就係距離食店幾個舖位有幾間五金回收公司，導致食店嘅外面間唔中都會有蚊蟲喺度飛黎飛去，所以如果等外賣嘅就真係要忍一忍，唔係嘅話最好都係堂食喇，因為食店入面好乾淨同舒服好多！ 順帶一提，食完可以去隔離嘅鰂魚涌海濱長廊散下步，黃昏同夜晚都幾有feel的喔嘿嘿！ 推介：★ ★ ★ ★ ★ 價錢：★ ★ ★ ☆ ☆ 視覺享受： ★ ★ ☆ ☆ ☆ 口感： ★ ★ ★ ★ ★ 店內環境： ★ ★ ★ ★ ☆ 等候時間：★ ★ ★ ☆ ☆ 店名：Yo Bago 地址：鰂魚涌濱海街80號地下 電話號碼：2561 7700 營業時間： Mon – Fri 0730 – 1930 *Sat 0730 – 1500* *Sun &紅日 要視乎有冇包場搞私人Party* 是次食評係由五號小編馬丁呈獻給您
