觀塘工廈近幾年都被林林總總嘅網絡食家、潮流達人報導過好多次,當中不乏咩隱世小店呀,邪惡拉芝呀等等。觀塘區當然都有唔少食Burger嘅餐廳,其中一間就係呢間OMG KITCHEN,身邊有唔少嘅朋友都一致好評。 今次小編就同朋友特登走入觀塘嘅工廈森林,睇下呢間係唔係真係咁好食! 間鋪都唔算難搵,觀塘地鐵B出口一直向前行,見到匯豐嘅街口就轉入去直行5分鐘搭lift上樓就到! 門口都同一般樓上cafe有啲唔同,除左擺咗啲裝飾品同宣傳物品之外,左邊仲有一個好大嘅架,上面吊住五顏六色嘅鹿仔吊飾,都幾特別! 入面其實唔大,最多大約都只係坐到25個人左右,但勝在個環境佈置得幾Warm,加上一直都會播住啲8,9年前嘅歌,小編聽下聽下都諗返起唔少初中回憶 同一般cafe一樣,鋪入面都有啲board game同棋,但可惜可以存放嘅地方有限,種類唔係話有好多。 另一邊存放左一啲書同棋,仲有部細細部嘅電子琴! 個Menu其實都有幾多嘢食,除左Burger係主要賣點之外,仲有飯、意粉、沙律同特色小食等等。 小編今次就同朋友試左兩個Burger同一個小食,分別係以餐廳名命名嘅OMG Burger同埋Double Cheese & Beef Burger! OMG Burger 「OMG牛堡」$64 上菜之前老闆(應該係)好貼心特登走過嚟問要唔要分成三份,方便我哋3個人分,好貼心! 個包入面有煎蛋、煙肉、薯餅、蕃茄、漢堡扒、蘑菇、菠蘿、芝士同用左BBQ醬汁,但唔知係唔係蘑菇缺貨,小編唔多覺有食到蘑菇,反而發現個包多左原本Menu冇提及嘅生菜同蕃茄係入面。 配料其實都真係幾豐富,但問題係太過多,加上塊薯餅因為比菠蘿墊住,搞到淋晒,個包同埋薯餅一拎就好易散曬,食得好狼狽,冇乜可能可以一啖食到唔同嘅層次,呢點係有啲可惜。但值得一讚嘅係塊漢堡扒好重牛味,唔係坊間普通嘅hea hea 漢堡扒,食落好Juicy,完全唔會覺得乾!另外個包有烘過,包面嘅芝麻同個皮都微微脆口,口感唔錯! 總括嚟講,可以一戰,但未必會再食。 Double Cheese & Beef Burger「多多芝牛堡」$54 小編覺得呢個反而仲好食過招牌OMG牛堡!多多芝牛堡嘅材料簡單好多,得兩塊芝士同兩塊漢堡扒,加埋BBQ醬汁。當然小編又發現有Menu冇提及嘅生菜同蕃茄。 兩塊充滿牛香又Juicy嘅漢堡扒再加上溶芝,望落雖然的確係有啲heavy,但食落真係啖啖幸福,塊漢堡扒真係個包嘅靈魂!總括嚟講,小編覺得呢個包可以再戰! Parma Ham – Hami Melon Roll「一口巴馬火腿哈蜜瓜卷」$26 好普通,個哈蜜瓜幾甜,但塊火腿就…嗯應該係喺超市買,好正常好普通嘅一塊巴馬火腿。小編唔建議大家試,除非突然好想食Parma Ham啦…不過厚道啲咁講,$26都唔可以要求太多,小編覺得咁樣都合理嘅。 總括嚟講,小編覺得店主都花左唔少心機喺啲佈置上,環境真係唔錯,服務態度亦都非常好!小編見到由烹煮,上菜到收錢,甚至連送外賣都係老闆(應該係) 一個人一腳踢,其實好犀利,雖然食物嘅質素就可圈可點,但小編都強烈建議大家可以去試下,因為性價比都算唔錯!順帶一提,其實兩個人Share一個Burger都得,因為真係幾大個! 推介:★ ★ ★ ★ ☆ 價錢:★ ★ ★ ★ ☆ 視覺享受: ★ ★ ☆ ☆ ☆ 口感: ★ ★ ★ ☆ ☆ 環境: ★ ★ ★ ★ ☆ 等候時間:★ ★ ★ ★ ★ 店名:OMG Kitchen 地址: 觀塘巧明街105號好運工業大廈7樓D室(觀塘地鐵站Exit B3/A2) 電話號碼:3460 2020 此食評係由五號小編馬丁為你呈獻