唔知大家係中學時期有冇試過lunchtime要出學校搵飯食呢？小編想當年最期待放lunch嗰陣可以同同學仔一齊出去搵食！但係你估得你一間放學咩，最可怕就係遇著其他中學同上班一族同你一齊等等等等等等等等⋯⋯遇著手腳慢嘅舖頭真係望住個lunch就完都未有得食呀！ 拿拿拿，我地hamblogger除左會介紹正到dum一聲嘅漢堡，仲要介紹埋性價比高嘅漢堡，唔通下下都要食成百幾蚊先有咩。 呢一間【樂心快餐店】係柯士甸路好多年啦，由小編細細個陣呢間快餐店已經係度嫁啦！你睇下餐牌上面啲字都甩色啦！仲有，睇下個舖面就知香港人開地舖有幾艱難，啲貨放埋出舖面，但係無阻呢間快餐店嘅人氣！ 小編冇嚇你，呢度附近有一間中學，一到中學生放飯時間，呢條街真係排到出晒去，可見【樂心快餐店】喺柯士甸路嘅人氣係好高㗎。小編試食當日好彩早過學生Lunch時間到達，如果唔係條路逼到行唔到㗎哈哈！ 基本上，【樂心快餐店】主要做外賣，舖入面右邊有兩三張椅子比你面壁食個飯，不過我諗要非繁忙時間先有人會坐係度食。小編個日係餐牌尋找「芝士」嘅身影，見到有一個係「芝士漢堡包」就秒速叫咗個啦。 小編就坐咗係度望住個叔叔係度烘熱個包同包上面嘅芝士，另外再煎肉（心心眼），等左大約6分鐘度左右啦，就收到呢個咁簡單嘅外賣哈哈！ 無錯，呢個包同西餐廳入面的漢堡包，係賣相方面唔太吸引。喂！不過大家唔好忘記，要呢種漢堡包先有傳統風味嫁嘛！好有懷舊feel！個包到左我手隔住個紙袋拎住都覺得好熱，但要忍一忍，影埋相比你哋睇先敢食呀嗚嗚⋯⋯ 嗱，買完拎上手第一下我會覺得：「唓，自己喺屋企整都得。」 芝士控嘅小編知道這是一片很普通的芝士，不過伙記烘溶左啲芝士，中間個啲溶晒落面包入面呢下就真係加晒分！仲有，嚿漢堡扒唔是完整嘅一塊，唔係少左一忽咁解，係舖頭用肉碎整嫁！小編咬落去嗰陣好多肉汁㗎！小編發現佢利用肉碎嘅白色肥肉呢一點將漢堡扒更易入口，一啲都唔乾呀！重要嘅嘢要講三次：呢個係一個唔dry嘅漢堡包！呢個係一個唔dry嘅漢堡包！呢個係一個唔dry嘅漢堡包！加上小編極愛將個包夾扁嚟食，肉汁配埋包入面少少嘅茄汁，喂成件事好juicy呀科科！ 店名：樂心快餐店 地址：尖沙咀柯士甸路15號C地下 (港鐵佐敦站 D 出口, 步行約8分鐘) 電話號碼：2367 9684/ 2723 1841 推介：★ ★ ★ ☆ ☆ 價錢：★ ★ ★ ★ ★ 視覺享受： ★ ★ ☆ ☆ ☆ 口感： ★ ★ ★ ★ ★ 環境： ★ ★ ★ ☆ ☆ 等候時間： ★ ★ ★ ★ ★ by一號小編迷你Min
