提起日本美食當然唔少得日本拉麵啦，黎過日本既人都知一般拉麵閒閒地都要過千円，不過好彩我住係佐世保，而呢間拉麵店唔單只最令我抁指回味而且價錢仲好親民添，係我在日既求學生涯都係靠佢撐住！ 呢間拉麵店叫「らーめん砦」位於佐世保万津町，係漁市場附近。 營業時間： 上午11:30~15:00 下午17:00~賣完為止(好快賣完!!) !!!逢星期日休息!!唔好摸門釘呀!!! 店長獲獎無數，仲成為長崎百選美食名店之一！！ 佐世保呢間係發原地同元袓所以好多日本國內旅行雜誌都有介紹過呢間店!!連住其他地方既日本人都專登黎食！不過由於價錢大眾化加上店面細小，一開門好快就無位!!要食就要早少少出門！不過就算要等，都唔會要你等好耐，大約半個鐘左右就有得入，點解？因為多數日本人都唔會係拉麵店到坐咁耐，見出面排隊既人多就好識做咁食快兩啖!!要傾計佢地會去Coffee Shop 唔似得我地，手機食先，又影呢樣影個樣，影到連麵都凍埋> < 以下既相我係冒住比人怒目鄙視既情況下偷偷快影架T^T 呢間舖頭有6款固定拉麵同1款限定拉麵，固定拉麵名非常特別，叫「吟嚷」、「燻銀」、「砦」、「亞細亞」、「海老味噌」、「超人的海老潮」，而限定拉麵就因季節而轉款同名，記得最近一次去幫襯時，有個限定拉麵名叫「來生一定要做公務員！！」哈哈，唔知道店長受到咩刺激咁激動改左個咁特別既名。不過6款固定拉麵淨係試過3款，每次都同自己講要試新野，點知去到都係叫返我最鐘意既「吟嚷」XDDD 「吟嚷」：湯底係用蝦蟹既殼加蕃茄餚製而成，濃郁既蕃茄蟹湯配上軟硬適中既麵，仲有半隻蟹腳！！記住係佐世保到食蟹腳係好貴架！真係貴到可以返香港食1隻蟹啊~~但老闆都絕不吝嗇，真係物超所值啊！ 「超人的海老潮」係我排行傍入面既第二位，用事先烤過既蝦頭，蝦殼去餚製出淺橙色既湯底，仲有2大隻連店長都覺得蝕本既貴價蝦！湯底有少少似「吟嚷」但蝦味重啲，少左蕃茄同蟹，所以無咁濃郁。 「砦」是鎮店之寶!!白色既湯底唔講以為係豬骨湯，點知原來係用貝類海產去餚製，湯底好鮮甜，但我個人覺得有少少腥，味道亦比其他拉麵較淡。(鍾意淡口同海鮮既朋友可以一試) 我本人重口味所以超愛「吟嚷」，而每次食襯都一定加佢地自制既炸蒜泥醬。呢個醬真係超級好食，就算食完個口有好大陣味，我都堅持一定要加，真係食過番尋味！！！ 佢地仲有個隱藏食法，可以加200円將淨低嘅湯再加芝士做湯飯，如果我有多一個胃我定會食埋佢。 除左拉麵仲有其他小食提供!!!炸雞翼(必食，超級酥脆)，煎餃子(一般，但朋友鍾意食)，鐵板燒小腸(比較油膩…) 之前聽人話日本人唔係好食動物內臟，但九州人竟然無臟不歡？？係九州內臟鍋係名物！下次有機會再介紹福岡內臟鍋啦~~ P.S. 店面同「砦」拉麵既相係另一部已死電腦入面T.T下次去食再影返~！ らーめん砦 (Lamen Toride ) 857-0877長崎県佐世保市万津町7-117-11 (佐世保JR站往五番街方向徒步8分鐘左右) 090-6776-3982
