小妹本身喜歡跑步，又喜歡行山，上星期日約咗一班街坊師兄去左一起玩~基於大家都係柴灣而大家想跑山，最近最方便當然係小西灣出發啦~ 小西灣經龍躍徑出發，其實可以去到好多地方~而我地就先上咗連外國人都慕名而來嘅龍脊~龍脊最近都好多人談論好多人去嘅地方，因為平路多，上山落山大部分有樓梯，基本上好多人都會帶埋狗仔小朋友一齊上黎~有時仲會見到有人跑山，仲會同我地打招呼講早晨架~ 由港島徑上，會有部分平路，樹蔭夠多，無論行定跑都好舒服 而我地初跑山只能係平路上跑，上山上斜都係要行，就算係平路都要小心地下有好多碎石，加上之前2日落過雨，就算上山個日幾好天都會有部分濕氣仲藏向石頭或者沙泥入面，而我跑嘅時侯都冼低咗，所以一定要小心路面。 就算平路都要小心有碎石，容易冼親~ 行多過跑嘅速度，其實大約1.5小時，就會上到龍脊最高點，打爛埕頂山， 風景好開揚，雖然個朝上到山仲有少少霧氣，但仍然可以望到大浪灣同石澳哥爾夫球場，仲望到好靚嘅藍塘海峽，係好值得上黎吹吹風睇風景架~ 而當日仲聽到有日本遊客指住風景大叫﹕すごい~~ 龍脊標記 之後沿路以輕快嘅腳步落山，落到石澳道無力其實係可以搭返9號巴士出返筲簊灣，而我地選擇向左沿車行(我地就跑落去~)可以去到鶴咀，再直行見到迴轉處睇指示牌分別可以去到石澳同大浪灣，基於車路關係一定要靠埋一邊行，小心睇車，小心睇車同小心睇車 (很重要所以要說3次) ，大約2公里左右就會到大浪灣停車場，再行入去就會見到左手邊有D 士多，可以補給一下體力~ 大浪灣士多 我地係到買左寶礦力，都只係10蚊支，附近其實仲有唔少士多可以坐低食下野，休息下~呢到D 姐姐好好人，同我地傾下計咁，又教我地邊條路打邊條路返去，Very Nice~我地係到休息完就經港島徑行返去馬塘坳，咁就可以經引水道返去柴灣墳場，或者經返砵甸乍郊遊徑返落小西灣~ 而大浪灣有2條路可以返去柴灣，其中一條係港島徑，另一條就經沙灘BBQ 場上去，聞說好多樓梯但風景好好多，唔似得港島徑咁左右兩邊都被樹包圍~但我就未行過個邊， 如果你有行過，可以話我知個邊風景有幾靚架~ 今次行山令我呢個行山新手學識左唔小，同大家分享小提示﹕ 1.自己垃圾自己帶走 香港郊遊景點大部分都好近城市，基本上唔洗好似外國咁要搭好遠車程先可以接近大自然，所以大家上山一定要好好保護山頭，記得要將自己垃圾自己帶返落山，雖然山上面可能有垃圾桶，但其實垃圾桶有機會畀野豬野狗翻倒垃圾出黎，加上餅乾零食嘅食物包裝袋好輕身，就算放入垃圾桶都會被風吹返出黎，吹到周圍都係，你都唔想咁好嘅風景被垃圾影響心情~ 而同士多姐姐傾過計，原來佢地入面初初都有做回收膠樽，可惜因為無人願意入去回收(始終太遠)，所以最後佢地最後都無做到回收，都係去堆填算…… 所以一定一定一定要Leave No Trace, 自己垃圾盡力自己帶返走~~ 2.帶地圖著合適嘅衣著 另外仲有好重要就係一定要帶地圖同合適嘅衣著，我地去到某D位都要用Google Map 睇下有無去錯路，覺得條路有唔妥一定要停低Check 下，如果唔係就好易蕩失路。而基於我地幾個都有人唔小心仆親，好彩大家都著行山專用嘅緊身長褲，保護左對腳，只係輕微擦損手，無咩大礙~ 行山其實最好著返運動衫褲，因為就算唔仆親，都好易被樹枝割損，為左唔好受傷，唔好著比堅尼行山啊~ 今次跑線 跑線: 小西灣集合--> 龍躍徑-->砵甸乍郊遊徑-->港島徑-->龍脊-->石澳道-->大浪灣-->港島徑-->馬塘坳-->引水道-->哥連臣角墳場-->柴灣 共約15公里，行多過跑，約3小時左右 --> 想知更多好玩好食好去處，立即Follow Instagram/Like Facebook Search: Greenandhomecook
