來到週三，又分享一下陳年蜜月，今天是最後一篇意大利遊記了！又是相同前言：這已是接近十年前的陳年遊記，照片質素較差，同時當中場景及價位未必適宜作旅遊參考。同時，當時資訊遠不及現在發達，那時還未知道五漁村！否則一定也會納入行程中.... 今篇主角是時尚之都的米蘭，也許是天氣，亦可能是城市化的影響，除了驚嘆米蘭歌德式教堂實在超美！名店街也非常吸引外，米蘭的整體吸引力絕對不及之前數站。中間也會加插去科莫湖不成，改到 Piacenza 閒逛的片段～ 再次到達米蘭火車站, 影張相先~ 第一件事都係搵酒店! 是晚房價係威尼斯的一平咋 房間當然都簡單好多 米蘭地鐵冇香港企理, 但總算比巴黎乾淨 24小時任搭pass只係3歐, 好抵喎 搭去Duomo, 一出站已經見到座教堂喇!! 同威尼斯差唔多的廣場, 但去到城市就冇左藍天 幾時都袋住食剩麵包的我, 又表演餵鴒~ 成日餵, 唔悶咩? 真係唔悶喎~ :p 哥德式的教堂確係堅靚!! 近睇 而且, 仲係免費入場+任影唔嬲~ 信眾點起的燭光~ 通花窗靚到爆, 老公影左勁多 點擊圖片放大 +2 教堂仲有底層, 不過依樣要收1歐參觀費喇 地庫有3邊, 依幅係其中一邊 講真, 睇完其實都唔知係乜~ 臨近出口, 一尊好出名的雕像 聖人身上披的, 係佢自己的皮!! 聽講教堂頂又係勁靚 我同老公決定俾多每人5歐, 上樓睇睇~ (5歐要行樓梯, 如果搭lift就要8歐) 冇記錯樓梯約300級, 好快就到達中層 再沿石梯上多1層就到頂, 果然氣派不凡~ 點擊圖片放大 機仔合照 定時自拍合照 之後去名店街shopping啦!!! 終於可以o黎朝聖啦, yeah! 其實shopping過程好快, 因為我向來目標單一而明確! 成功!! 就係你喇~ ^^ 係prada總店朝聖完, 其餘就留返巴黎尾站再買過!! 完成一個心願, 又去搵Cova總店圓另一個夢 搵係搵到, 可惜... 同意大利想book的幾間米芝蓮一樣, 成個8月唔開呀! 唔開心.... 好鬼失落囉, 幸而有盤車形盆栽氹下我開心 真係好搞鬼~ ^^ 去唔到cova, 又去返名店街, 轉投gucci懷抱~ 唔係去血併呀, 而係嘆下午茶~ 想食的朱古力cake賣哂, 齋嘆下咖啡啦~ 老公同佢的cappuccino~ 意文中latte即是牛奶, caffe latte先係鮮奶咖啡 我一時死蠢忘記左, 就咁叫左杯鮮奶!!! @@ 不過鮮奶都有打過, 既香又細的泡沫幾吸引架 佢的menu同賬單都好靚, 幾想拎走做紀念呀... (呵呵, 係就抵喇, 一定貴過餐茶!! :p) 未夠鐘開餐, 去左個寧靜的小區行下 俾人偷影我無聊吹蒲公英... 8月, 真係好多舖頭都關門~ 無聊時最佳活動 -- 行超市~ 又有間lonely planet推介雪糕店呀!! 雖然是日天陰清涼, 都照食~~~ 揀乜好呢? 我地都愛上左開心果味, 一定揀佢做膽! 此外我至愛的古力, 老公至愛的檸檬, 都係常食口味 晚餐地點一早諗好, 就係酒店對面的sabatini!! 雖然同帝苑的毫無關係, 但我地就係咁膚淺, 哈哈 環境寧靜舒服~ 又係冇黑醋的麵包 米蘭式番紅花意大利飯 - 唔好睇佢一pat黃色唔開胃咁, 吃來係難以想像的美味!! 意式燒烤拼盤 -- 有飯又有肉, 老公好開心呀!! 返到酒店開埋白酒, 睇下movie, 好寫意~ 第2朝於酒店早餐 內容簡單, 但而不失美味 由早餐位望落街, 仲可以見到琴晚食飯的sabatini~ 又偷影我, 怒啤老公先~ 原本打算去睇科莫湖, 但因班次問題改去較近的Piacenza, 車程只約半小時~ 小鎮頗寧靜, 人唔多 雖乜特別景點, 但我同老公都幾enjoy乜都影一餐 城牆遺趾? 點擊圖片放大 行在古樸的街道, 可以想像其實好多意大利人的生活原來仲係好簡單~ ^^ 點擊圖片放大 有鞦韆呀!! 老公影完後, 我馬上衝去玩啦~~ 圓拱形的怪建築 2小時的亂走亂行之旅就此結束, 之後又返去米蘭! 再次返到米蘭, 仲有2個鐘先離開 咁去"睇"埋最後的晚餐啦! 唔識路成日都要問人... 雖然英文麻麻, 但意大利人總會好盡力解答, 連城市型的米蘭都唔例外. 相比法國, 好鍾意意大利依點!! 差唔多去到啦~ 仲以為係上面紅磚屋, 原來仲要行~ 達文西的大作《最後的晚餐》就係收藏於此小館~ 幅畫超巴閉, 要睇要收費不但止, 仲要早N個月打電話預約, 我地當然做唔到啦 當日都扮懞想俾錢混入場, 都係唔成功, 唯有在館外影一影算數~ 買張postcard咪當睇左, 我地好阿Q架~ ^^ 回程啦, 沿路見到間好吸引的朱古力店 唔夠時間坐底慢慢食添.. 好在火車站都有間吸引的雪糕店 開心果朱古力脆皮條 Tiramisu 下一站已經係法國尼斯 (兩口子後來很喜歡的地方)~ 意大利拜拜喇!! 延伸閱讀 2009 意大利 + 法國蜜月遊記 ❤ 總結篇 2009 陳年意大利 + 法國蜜月遊記 ⚜ Firenze 佛羅倫斯 ⚜ 2009 陳年意大利 + 法國蜜月遊記 ♰ 比薩半天 Pisa + Siena ♰ 2009 陳年意大利 + 法國蜜月遊記 ✤ Venice 威尼斯 ✤ 預覽及總結＊2014摘星高茶音樂劇5週年倫敦行＊ 六週年鐵婚曼谷之旅 ஐ Iron Wedding Bangkok Trip ஐ 旅程總結 七週年銅婚 ஐ Copper Wedding Bangkok Trip ஐ 曼谷之旅總結 2017 Sydney Trip Summary ❤ 悉尼8週年陶婚 x 探親之旅 ** 想得知最新飲食情報，可追蹤 甜魔媽媽；欲得知甜魔一家消息，就追蹤 Matthew and Chloe 吧~~
