曾於早期小時光試業階段時摸門釘，呢個週末終於可以一嚐台灣古早滋味，感受懷舊慢活小時光喇﹗ 星期六的中午12點幾來到仲有位，未駛排隊住，café面積比想像中大，座位都幾多，配合台灣國小課室設計，café的枱枱櫈櫈全部都係大家曾經非常熟悉又好懷念的班房書枱同櫈，四周亦擺滿懷舊的玩具、小鋼琴，仲有好多好多舊漫畫，十足十以前課室咁，就連店員都著埋國小校服，非常認真，充滿那些年的感覺~ Café係自助形式點餐同攞餐，坐低之後店員就會比個餐牌你睇，揀啱就可以去櫃枱個邊落單架喇。睇睇menu飯類麵類的款式都唔少架，價錢都非常相宜，約$45-$60左右，飲品就另外收費既~ 要細嚐台南風味，台式滷肉便當就夠哂地道，台味十足。配料豐富包括有金錢牛展肉、豬面肉、雞翼、滷蛋、豆腐同蘿蔔，款款夠哂入味，加埋滷肉飯，真係古早味濃。不過個飯本身完全無飯味，而滷肉份量亦略少，所以滷肉飯味道略淡。 另外，點咗夜市香酥雞便當，炸雞扒size大過塊面，用上巴西雞扒，夠哂厚切，外層炸得非常香脆而唔油膩，內裡肉質鮮嫩，十分香口好食，大大推介﹗不過白飯同樣無味，如果香酥雞扒可以有D醬汁點下送飯就正嘞﹗ 飲品都有唔少選擇架，有台式特調、蘇打系列同養生花茶等等….我就揀咗水蜜桃蘇打，賣相都幾好，不過我麻麻地好cream，同埋味道略酸，不過都好味的。但其實支飲管太幼好難啜，經已同店員反映，希望佢地會增設粗飲管喇=] 整體感覺良好，走入工廈一轉角就完全去咗另一個世界，啱哂大家週末扮文青去hea下食個lunch，當去咗轉台灣喇~ 小時光 觀塘興業街18號美興工業大廈A座1樓C室 其他連結︰ ♥ Gourmet Raxxit’s Blogspot ♥ ♥ Gourmet Raxxit’s Facebook ♥
