平日食吉列豬扒定食閒閒地都要$160以上，雖然係好食，不過又唔係幾抵食，特別係lunch。不過最近發現尖沙咀的とん勝 Tonkachi原來有個超級抵食的午餐menu，連星期六日都適用架﹗ 星期日的1點鐘度同男友來到位於地庫的とん勝 Tonkachi，人客唔多，環境清靜，大部分食客仲要係日本人，香港食客好似都係得2-3枱。是次特別推介的係每日限定30份的吉列豬柳御膳，只需$50，有一份吉列豬柳、白飯、味噌湯同一大碟高麗菜絲，加$8仲附送汽水無酒精等飲品，實在係太抵食喇﹗就算唔係頭30份內，之後都係$68/份，點都係抵﹗ 其實除咗吉列豬柳套餐，其他午餐都好抵好吸引，好似吉列豬扒同炸雞定食，講起又肚餓喇，搵日一定要再來試﹗ 雖然係午餐，不過份量完全無減，每份豬柳約有8件，件頭亦唔細。最重要係非常香脆可口，吉列外層夠哂鬆化，真係食到“sharp sharp”聲，又唔會覺得好油膩。豬柳肉質軟腍，唔會韌或鞋口，諗起又想食XDD 同其他吉列專門店一樣，高麗菜絲可以無限添加，配日式麻醬食又得，點豬扒醬食又得，十分清新爽口。 不過呢度的味噌湯同其他店唔同，出面通常都係用海帶豆腐，而呢度的味噌湯用料豐富，有豬肉粒、魔芋片、牛蒡片同蘿蔔，雖然有少少油，不過味道濃郁，比起其他味噌湯好飲得多﹗唯一要挑剔的地方係D飯偏濕同淋，可能啱啱煲起，如果可以乾身D就好嘞﹗ 同男友一路食一路講唔知我地係咪30份內，又唔敢問侍應XDD 最後埋單$130有找，每份加埋一都唔駛$64，真係超級抵食﹗ 日本料理とん勝 地址︰尖沙咀赫德道4號The Hart地庫 其他連結︰ ♥ Gourmet Raxxit’s Blogspot ♥ ♥ Gourmet Raxxit’s Facebook ♥
