一個多月前先第一次到Jamie’s Italian銅鑼灣店潮聖，估唔到咁快又有機會到全新尖沙咀店試試。尖沙咀分店面積較細，不過間格勝在夠四正，座位夠集中，而燈光亦較銅鑼灣店光猛，唔會有越食越眼訓的感覺。裝潢繼續大玩中西合璧style，如四面牆壁都畫上舊香港景色的graffiti，充滿香港風情﹗ 點擊圖片放大 +2 Menu同樣有中英版兩面，不過尖沙咀店就多咗幾款新菜式，包括正常意大利餐廳必有的pizza、garlic bread、Portobello Mushroom Fritti同埋Wild Truffle Risotto。 新加入menu的4款artisan pizza分別有Florentina、Seafood、Hong Kong Hot同Funghi Mista，聽個名Hong Kong Hot (香港風情)好似幾特別咁，於是就揀咗呢個。賣相同我地想像的有D出入，明明係有salami同meatball，但一黎就淨係見到一條條的紅椒、青椒、黃椒，仲以為我地點錯。Pizza整體味道偏鹹，配料分佈非常不均，條條辣椒唔係太鹹就太酸，成個pizza都非常重口味，唔知係咪因為咁樣所以叫做香港風情，希望下次再有機會試試其他款式的pizza喇﹗ 另外點咗兩款小食前菜，有賣相特別、有D似雞蛋仔的的香脆意大利芝士雲吞，店員上菜的時候都有介紹雲吞內的3款芝士，包括fontina、parmesan同ricotta cheese，不過芝士份量較少，食唔出濃濃的芝士味，只係食到點咗香辣蕃茄醬的nacho味道；同樣用香辣蕃茄醬烹調的有意大利香辣雞翼，配埋新鮮青檸汁，酸酸辣辣非常惹味﹗ 今次主菜揀咗秘製自由放養烤雞 (Chicken Al Mattone)，但賣相完全睇唔出係一碟雞，更加唔似係烤雞。伴碟的法包多士沾滿香濃蘑菇醬汁，非常香口好食。不過烤雞食唔出香烤的味道，雖然係marinated，但蘑菇醬汁的味道只係沾到雞的表面，所以唔夠入味，對呢款主菜有D失望。 上回食過蟹肉意粉麻麻地，今次叫咗牛肝菌闊條麵，口感非常creamy，牛肝菌味道香濃，闊條麵亦夠煙韌，今次意粉加番分﹗ 係銅鑼灣食過Epic Brownie後讚不絕口，仲誠意推介過呢款甜品，無諗過呢個signature dessert係尖沙咀店竟然會出事﹗呢度的Epic Brownie先係無加朱古力醬，無咗香濃同rich的口感。而海鹽焦糖雪糕更係鹹到一個點….唔太能夠接受，從來未食過鹹到咁的salted caramel雪糕，同之前食過個個出入好大，真係唔知出咗咩事@@ 全場唯一比較有好評的係Berry Blast mocktail，非常清甜，帶少少雜莓果酸，開胃又解渴，而且價錢相宜。 新店試業數天，店員未太上手，部分睇落經驗尚淺，服務質素有待改善，整體食物同服務水準較銅鑼灣店遜色。不過值得一提的係尖沙咀店有outdoor座位，係陽光微風下嘆lunch或食tea係個唔錯的選擇。 Jamie's Italian 地址︰尖沙咀海港城海洋中心 4 樓 412 號舖 其他連結︰ ♥ Gourmet Raxxit’s Blogspot ♥ ♥ Gourmet Raxxit’s Facebook ♥
