本地薑西班牙餐廳由中環BCN原店搬往美食天堂大坑,改名Paella Paella。雖然之前未試過檔次較高既BCN,不過新店感覺親民、設計夠raw,又有另一番風味﹗最欣賞餐廳對食材同煮法既要求,大部份食材均由西班牙運港,烹調做法依足傳統之餘,更加入創意調製新口味,非常有heart﹗ 食西班牙菜飲sangria是常識吧?Paella Paella既1 jar sangria雖然都唔太便宜,不過確實係好大jar,4個人每人都可以飲到2-3杯﹗最窩心既係連冰都用sangria整,就算溶咗都唔會整淡酒味,有心思,值得加分﹗ 鍾意西班牙菜既其中一個原因係佢地既tapas culture,碟頭細細,但款式多多。呢款西班牙cold cut拼盤就有黑毛豬火腿、lomo (黑毛豬豬背肉)同chorizo (西班牙辣腸)配芝士。意大利人食parma ham就配蜜瓜,西班牙人食黑毛豬火腿就會配manchego cheese,又或者麵包片,更加突顯iberico ham既鹹鮮味。老闆仲親自逐款介紹添,餐廳既黑毛豬火腿全部都風乾48個月,由西班牙農場飼養、宰割豬隻,切片後真空到港。三款之中我最鍾意食黑毛豬火腿,肥瘦均勻,口感油潤,脂肪入口即溶。 之後呢款第一次見既tapas,就係西班牙黑布甸配麵包,包上兩片既黑布甸係以黑毛豬血同西班牙米製成,賣相同台灣豬血糕都幾似,有好多人都唔鍾意食豬紅/豬血,偏偏我地呢枱人都好buy﹗黑布甸質感較軟腍,唔似台灣豬血糕咁結實,配埋香脆麵包同甜甜既洋蔥醬,超級醒胃,一D腥味都無﹗洋蔥醬稍為偏甜,但整體非常好食,誠意推介﹗必食﹗ 帶子carpaccio又係我必點既tapas之一,鮮嫩帶子薄片配以橄欖油同三文魚子、葵籽、蕃茄乾粒,食落更有口感,完全唔膩。 另外,Paella Paella既西班牙蛋餅 (tortilla) 更有別於一般傳統既tortilla。先係賣相睇落比較似大阪燒,可能加咗沙律醬係面既關係。本來叫咗鯷魚tortilla,不過因為落錯單最後黎咗菠菜tortilla,起初我仲一路食一路搵D鯷魚,但係搵極都搵唔到XD另一個特別之處就係流心蛋餅,一般傳統tortilla都係內外全熟,而Paella Paella既西班牙蛋餅一切開就會有暖暖既蛋汁流出,金黃色蛋皮內層口感滑溜軟嫩,啱哂嘴刁既香港人﹗ 為咗一嚐鯷魚之味,我地就叫咗蕃茄鯷魚麵包。老闆話佢地用咗4款唔同國家既蕃茄做呢個茄醬,淡淡酸甜,更能帶出油漬鯷魚既滋味,非常好食開胃﹗ 壓軸當然有招牌菜西班牙大鑊飯(paella),左揀右揀之下,最終叫咗西班牙魷魚墨汁炒飯,入口啖啖魷魚粒,夠哂足料,非常爽口,西班牙飯加入墨汁炒,粒粒香濃,而且煙韌有咬口,啱哂唔鍾意食軟飯既我﹗最得意係餐廳會比個迷你paella鑊客人做碟,非常有諗頭呀﹗食到最尾老闆仲特登過來幫我地挖飯焦添呀﹗餐廳一共有9款炒飯,另外仲有一款西班牙海鮮麵,睇落脆卜卜,下次一定要試呀﹗ 最最最後,點都要食埋西班牙特色甜點churro,最欣賞上枱仲係暖笠笠既朱古力漿﹗比外面一般既churro少砂糖,就算成條點滿朱古力漿都唔會好甜好膩,朱古力漿仲好rich好香,非常好味﹗ ❤ http://gourmetraxxit.blogspot.hk/ ❤ ❤ https://www.facebook.com/LovetoEatRaxxit/ ❤