適逢天氣回暖，天朗氣清，最好就到市郊活動下。今次黎到大埔，一心諗住去鐵路局博物館行下路軌影下相。成日睇飲食雜誌介紹，見到大埔開咗好多間休閒café，不過一路都無機會試。(因為貪食兔係港島區居民:P) 於是上網就搵到呢間叫A Little Bit既café，仲有幾豐富既All Day Breakfast，咁我地就展開咗呢個尋找大埔All Day Breakfast既旅程嘞﹗ 講真都唔係易搵，亦唔算近火車站，加上我地兩個唔係新界人，由太和火車站行下行下，都應該行咗3個幾字先度，大約點半去到，好在唔駛等位唧﹗餐廳環境簡約、以白色格調為主，都擺到10張2人枱。 一打開menu見到All Day Breakfast，分別有A Little Bit Relax ($79)、A Little Graceful ($94)同A Little Bit Tasteful ($112)三款，男友問我有咩分別，話都係有個幾樣野食，其實細心一睇，餐廳已經highlight咗三款All Day Breakfast既不同地方。最後我地揀咗最豐富既A Little Bit Tasteful再加一份自家製雞翼，同埋一杯朱古力奶昔。 A Little Bit Tasteful材料豐富，有齊一般All Day Breakfast既配料，仲有得揀English muffin或waffle，法蘭克福腸、煙肉、漢堡扒同muffin各有兩件，仲有一份新鮮雜果，超級足料，一個人實食唔哂呀﹗煙三文魚就稍為細份，另外如果可以再多D茄汁豆就perfect嘞﹗ 杯朱古力奶昔外型就夠特別，不過質感同味道都似朱古力smoothies多過milkshake，唔知有無落錯單呢…. 自家製雞翼有4隻同6隻揀，味道甜甜，加上淡淡既香草味，都值得一試。 如果住大埔附近既話，都會成日黎食既…..可惜我唔係喇….:P ❤ http://gourmetraxxit.blogspot.hk/ ❤
