早前有朋友從台灣來香港，曾經問我想找間酒店，適合小朋友之餘，又要有度假feel，仲要餐廳好食，當時二話不說就推薦了沙田凱悅，先別說之前跟太太及細囝 staycation 的體驗，其實中菜廳一向有水準，烤鴨固然係名物，餐廳經常推出新菜色，都令人有驚喜。點心 蟹肉金瓜水晶餃餡料用上新鮮蟹肉，自然夠甜美可口。 蜂巢芋泥煙鴨盒炸得好乾身，毫無油膩感，咬落酥化，而內裡的鴨肉非常惹味，處理得相當好。主菜 辣椒餅四角豆爆炒蝦球 自問經常去街市買餸，但海南島四角豆又真係未見過，反而係沙田18就食到，而辣椒餅是大廚每年私人特製，以紫蘇葉、辣椒及麵豉炒好再壓成餅形，每次煮菜都可以方便使用，蝦球及四角豆沾上醬汁後，惹味到一個點，用來伴飯一流。 禮雲子蝦米炒柚皮自小就喜歡食柚皮，尤其是每次中秋過後，就食得更多，因為中秋節有沙田柚食，可以話物盡其用嘛！蒸及煮的柚皮都食過不少次，今次以禮雲子及蝦米去炒，外層濃郁的蝦米幽香，以及禮雲子豐腴的口感，令柚皮變得及香口惹味。 香炸臭豆腐臭豆腐其實同榴槤一樣，喜歡的自然喜歡，反之就敬而遠之，好彩，自己一向都重口味，細路時係街邊不知掃了多少件，今次平民食物上酒店檯，自然有秘密，外表跟平常見到的差不多，咬落外脆內臭，而且有層次，原來是加入了西班牙豬肉肉碎、荸薺及荽茜，然後再定形，果然是天花板級臭豆腐，當然，加埋甜辣醬就更有風味。 砂鍋海鮮臭豆腐 除了炸臭豆腐外，另一道具砂鍋臭豆腐又是伴飯菜，鮮魚湯底本身呈乳白色，加入泡椒，增強了辣度的層次，海鮮有東風螺、沙白、鮮魷及大蝦，鮮味都溶入湯裡，再有臭豆腐的化合作用，惹味到極 。甜品都說過很欣賞及喜歡沙田18的中式甜品，最特別之處係以中式糖果融入其中，而不失神韻。 焗鳳梨山楂酥即點即焗，拎上手仍覺熱燙，外層酥皮鬆化芳香，餡料以鳳梨混和了山楂，甜酸平均，有點QQ的口感，做得非常出色。 青檸話梅撻酸酸甜甜的味道，揉合了兩種中式元素，造型獨特，說是甜品，卻又帶點酸，很有趣的組合。 糖冬瓜開心果雪糕是日最喜歡的甜點，以糖冬瓜來炮製雪糕，上面更放有幾條糖冬瓜條，令人感覺似在食凍的糖冬瓜，甜美可口。 鹹蛋黃雪糕天使與魔鬼的混合體，鹹蛋黃已經夠邪惡，食落有粒粒的鹹蛋黃碎，很特別，再配上脆卜卜的芝麻薄卷，兩種不同口感夾雜，真美妙。去了沙田18多次，從來都沒有令人失望過，原有的叉燒及烤鴨固然有水準，菜色與時更新，甜品更是每次都有驚喜，期待下次的味覺之旅。Facebook 專頁 : Hyatt Regency Hong Kong, Sha Tin 地址 : 沙田澤祥街18號沙田凱悅酒店4樓 電話 : 37237932 味道 : 5 環境 : 5 服務 : 5 衛生 : 5 抵食 : 4 位置 : 4 如果喜歡這篇文章,請在我的專頁上剔"LIKE",當是給我小小的鼓勵吧!謝謝! http://www.facebook.com/foodiephilip
