近月寫自助餐,都喜歡先抽起回本位講講,而上星期跟太太入住Gateway Hotel Hong Kong Staycation,本身只包早餐Buffet,但難得放鬆一晚,無可能走出街四圍搵餐廳吧?由於限聚令下,餐桌間要保持一定距離,所以感覺更加寛敞闊落。期間最值得欣賞是餐廳特設一位專員,每隔半小時便會由頭到尾把所有食具包括食物夾及碟都更換,現場所見,真係無停過手,而且服務員清理檯面,收拾碗碟好快手,客人出入又會提醒戴上口罩,值得一讚。點擊圖片放大 +5 即劏原條35kg黃鰭吞拿魚食 Buffet 當然要先找亮點,Three on Canton暫時每星期都會即劏原條菲律賓黃鰭吞拿魚,係疫情下依然咁大手筆,而且係即食,試問又點會唔吸睛吖!大家要記住,大約7點左右,師傅會推條魚出場,10分鐘後會即劏,同埋即時切開比大家享用。 另一個亮點係西班牙海鮮飯,仲要係豪華版,因為除了有海蝦、魷魚、青口基本海鮮外,更有半開龍蝦,夠矜貴了吧?至於係邊度?就要大家去搵下啦! 香煎鵝肝即煎即食,滿口都是油香,因為細細件,食多幾舊都不怕膽固醇超標。點擊圖片放大 +3 生蠔說起來,已經好耐無係自助餐見到即開生蠔,Three on Canton 提供法國Fine De Claire生蠔,仲要係即開貨色保證新鮮衛生,雖然每次只限拎兩隻,但開蠔師傅好快手,無須等好耐。蠔肉真係好鮮甜,邊位有少許爽口,又有些少海水味,好正。海鮮區 首選當然係半開波士頓龍蝦,由於太受歡迎,偶爾都要等一陣,不過真係好多膏,同樣肉質不會死實,隔離檯位少女可以一次過鯨吞兩隻,我都自嘆不如。 另一款較受歡迎係麵包蟹,不過蟹膏比較結實同埋蟹殼都幾硬淨,想食都要花點功夫。點擊圖片放大 其他仲有青口、翡翠螺、鱈場蟹腳及藍貝,講真吖,海鮮陣容真係幾強。刺身 有甜蝦、八爪魚、三文魚及日式捲蛋,其實淨食拖羅都夠啦,不過幾款刺身都毫無雪味,肉質柔軟,不錯。 其實餐廳將不同食物分成不同區間,太太比較鍾意食東南亞菜,尤其是必食海南雞飯。雞肉真係好嫩滑,而雞油飯粒顆分明,有水準。 湯品有西湯海鮮週打湯同埋中湯係青紅蘿蔔牛尾湯,喜歡飲湯的朋友仲有蟲草花紅棗圓肉唐排燉湯,火喉十足,自己係懶人一族,係屋企煲湯仲勉強可以,燉湯就咪攪,有機會梗係飲多兩碗。點擊圖片放大 同一個Station,有印尼沙律、泰式鳳爪、泰式牛肉沙律、泰式海鮮沙律同雜菜沙律,清清地來點輕食也不錯。點擊圖片放大 +2 而泰式紅咖哩雞、泰式蒸烏頭、泰式黃咖哩炒蟹及冬陰功,味道好正宗,因為大廚係泰籍師傅嘛!點擊圖片放大 泰式船麵湯底好香,麵條可以自行配搭,加少少辣魚露仲正,就連銀針粉都有,真開心,當然,同樣有辣辣地既喇沙湯及鮮甜既清雞湯底,總之各適其適啦!點擊圖片放大 +2 去到餐廳另一邊,就係Carving Station,第一當然係法式海鮮湯 (Bouillabaisse)足6kg三文魚放湯,真的誇張,湯底仲有龍蝦鉗、青口及海蝦,難怪味道濃郁。 海鮮食得太多,都要食下其他菜色,烤羊架大約七成熟,羶味偏重,但好啱我,再蘸點mint jelly同芥末,正。而烤肉眼正好切到中間帶血絲位置,鬆軟有嚼口。點擊圖片放大 加埋蒜香牛油焗海鮮、乳酪海鮮咖哩、黑松露汁煎鱒魚、日式照燒雞、約瑟布甸、燒豬肋骨、紅酒燴牛肉、side dish既車厘茄、炒雜菌及香草薯仔,都幾無可能食得晒。咖喱專區點擊圖片放大 +3 整個區份特意沒有豬肉,而咖喱菜色有印度咖哩羊肉、雜菜咖哩、印度烤雞、印度咖哩雞、印度飯、印式脆餅及蒜蓉烤餅,種類夠多,而且由印籍大廚主理,力求味道正宗。芝士及沙律區 芝士比較簡單,只有Emmenthal、Brie及Gouda三款口味。點擊圖片放大 +2 想清清地,不妨食下沙律,因為有煙三文魚、韓式海鮮沙律、西班牙凍湯、八爪魚薯仔沙律及田園沙律。熱葷主要以中式為主。 重心推介片皮鴨,「麼麼皮」用蒸籠保溫,加些少京蔥、青瓜絲同海鮮醬卷起食,滿有油香。點擊圖片放大 +2 其他仲有椒鹽蝦、薑蔥蒸魚、鹹蛋黃軟殼蟹、翠玉瓜炒牛肉及海鮮炒飯。甜品 甜品區屬於另一個遭人圍剿的area,哈根大師雪糕專櫃有香檸雪葩、雲呢拿、咖啡、士多啤梨及比利時朱古力口味,太太用窩夫加球香草雪糕,然後澆上朱古力醬,加少少toppings,正。 哈根大師雪糕批有Strawberry and Cream、Cookies and Cream 與及Peanut butter crunch三款口味,係超市閒閒地都三幾十蚊一條啦,家陣可以任食,真好。 至於整個360度環迴甜品區,放滿了中西式甜品。點擊圖片放大 +8 先講下西式甜品,有美式芝士蛋糕、Oreo朱古力芝士蛋糕、栗子黑莓慕斯、朱古力cupcake、芒果熱情果慕斯蛋糕、芝士瑪德蓮貝殼蛋糕、紅桑莓朱古力慕絲蛋糕、藍莓芝士蛋糕、黑朱古力松露蛋糕、開心果士多啤梨慕絲蛋糕、雲呢拿焦糖燉蛋、意大利芝士蛋糕、自助班戟機同埋麵包布甸配雲呢拿汁。當然會有中式甜品,椰汁糕、豆腐花、涼粉及雜果。 而甜品凍櫃則有北海道3.6牛乳布甸、黑加侖子杏桃慕絲及櫻桃黑森林慕絲。 畢竟是酒店自家出品,賣相同質素有保證,其實單係食甜品做放題都夠玩。 食得實在太飽,好彩仲有水果幫助消化,菠蘿、西瓜、蜜瓜、熱情果、西柚及青紅蘋果,既新鮮又甜美。 好欣賞朱古力噴泉位,特意調較至低位,正好讓小朋友可以自行用棉花糖蘸點朱古力漿。P.S : 11月份,星期一至四 成人 $658 + 10% 小童$398 +10%星期五至日 $688 + 10% 小童$408 +10%openrice 8折 : (優惠連結)11月一位大人可以免費帶兩位小童(weekday only)Facebook 專頁 : Gateway Hotel, Marco Polo Hotels餐廳專頁 : Three on Canton地址 : 尖沙咀廣東道13號海港城港威酒店3樓 電話 : 21137828 味道 : 4 環境 : 4 服務 : 5 衛生 : 5 抵食 : 5 位置 : 5 希望各位喜歡這篇文章的朋友,請在我的專頁上剔"LIKE",當作小小的鼓勵吧!謝謝! http://www.facebook.com/foodiephilip