早前點心大戰，的確走訪了好多間餐廳，當中都是酒店又或是米芝蓮星級菜館，由$34碟起跳，到$400位都試過，當中都有試過中伏，容後跟大家分享。 由於限聚令下，外賣近日成了主戰場，但點心任食依然有一定吸引力，早幾日就跟朋友造訪了位於紅磡君綽海逸酒店的海雲天。 雖然是平日的一點鐘，但每檯只限坐兩人，所以都全場爆滿，錯有錯著，反而給安排到大廂房，不單止較寧靜，可以同朋友聊天，而且有靠玻璃窗位，可以望到海景，心情都靚D，檯與檯之間寬敞闊落，毫無侷促的感覺。 望望點心紙，大約40幾款，任食點心90分鐘，每位$168，另加茶芥$23，其實連埋加一都係$220左右，畢竟係酒店中菜廳，說起來都相當划算，講真，就算係街坊茶居「一盅兩件」都要幾十蚊落樓。餐廳有三款點心是限量供應，每位只得一客，原先的蟹蓋之類是通通不見了，大家可要注意。由落單到上菜不用10分鐘，效率令人滿意，而且無甩漏，值得一讚。 椰皇燕窩燉鮮奶原個上，熱辣辣好清甜，質地滑溜，正。 蜜汁火方可能影相太耐，包皮有點乾，但腐皮炸得好脆，而且油溫控制好，所以色澤淡雅，加埋用蜜汁燴過的火腿，口感複雜，層次分明。 富貴鮑魚撻鮑魚當然細size，撻皮食落仍有酥化感覺，不過不失。任食點心 蟹籽燒賣比較實淨，但真材實料，蝦肉爽彈，不錯。 翡翠明蝦餃蝦餃皮擀得夠水準，皮薄而柔韌，略嫌摺紋未夠多，蝦肉清爽，好味，難怪聽聞有人單點蝦餃，食足幾十隻，真係回本。 黑金流沙包用竹炭粉搓包皮，鬆軟可口，餡料流心個人覺得可以多少少。 冬陰功豬皮魚蛋好有趣既組合，但個人始終喜歡咖喱魚蛋。 脆皮南瓜餅賣相幾神似，外層炸至微脆，內裡是熱燙的豆沙蓉，正。 碧綠鮮蝦腸粉腸粉皮可以更薄，蝦肉爽彈，合格。 鮮果沙律鮮蝦筒令自己想起係「東來順」的不快經驗，今次好好多，春卷皮炸得脆卜卜，蝦肉跟沙律好合拍，有時候星級餐廳未必好，平民餐廳都會有驚喜。 擂沙湯圓一碟4件，口感QQ，可以一試。皮蛋瘦肉粥廣東開花米粥底，但幾杰身，好易飽肚，但好彩細細碗。 蒜蓉蝦蒸飯用小鍋上，蝦蒸得有點乾身，下次可以不理。 魚湯浸菜苗食得太多重口味，來碟清清地菜蔬，菜苗幾嫩，不錯。 胡椒鹹菜豬肚豬肚同鹹菜都煮得好稔，幾重胡椒味，啱我。 鮑汁雞腳好正常，純粹想啜下腳指，過口癮。 日式海苔茄子茄子切粒後蘸上炸漿，都幾薄身，而且油份算輕盈。 椒鹽豆腐粒其實可以炸得更乾身一點。 黃金涼瓜條朋友指定要食，薄薄的一層咸蛋黃好香口。 乾扁蓮藕條雖然服務員好心提過話好咸，但食落又不太覺得，反而好爽脆，幾惹味。 椰汁紅豆糕至於壓軸食紅豆糕清清味蕾都好吖！胃納有限，計落其實90分鐘內只係試了17款點心，當然會有滄海遺珠的感覺。至於其他點心有金鈎潮州粉果、蜜汁叉燒包、馬蹄牛肉腸、珍菌松露上素餃、迷你焗葡撻、香芋鮮排骨、鮮竹牛肉球、金珠鹹水角、白肉鮮竹卷及豉椒醬皇蒸鳳爪，就算只得一兩件，大家未必可以試足咁多款。甜品類仲有黑糖蜂巢糕、香草綠豆沙及金絲蜜糖脆脆。加上澱粉質類既XO醬炒腸粉、豉油皇炒麵、鹹魚茸雞粒炒飯及荷香珍珠雞。前菜及小食仲有白灼菜心、手拍青瓜、川味口水雞、冰鎮豬手、千島醬煙鴨胸、南乳雞中翼、紅腰豆雜果沙律及肉鬆豆腐，我諗一般人都係只可以食到15款左右，若然閣下係大胃王，又喜歡食點心，真係值得去試下。 地址 : 紅磡德豐街20號九龍海逸君綽酒店2樓 電話 : 29968459 味道 : 4 環境 : 4 服務 : 4 衛生 : 4 抵食 : 5 位置 : 4 希望各位喜歡這篇文章的朋友，請在我的專頁上剔"LIKE"，當作小小的鼓勵吧!謝謝! http://www.facebook.com/foodiephilip
