都講過，當大家仲頭痛緊兩人一檯，就算順延到10點，都只可以方便到情侶，其實酒店外賣都未嘗不是一個解決方法，一來無須買、洗、煮，二來質素有保證，部份餐廳可能貴少少，但細心搵下，都能發掘出不少平靚正之選，視乎大家有無心。今次介紹位於天后地鐵站對面既如心銅鑼灣海景酒店西餐廳Corner 18，同樣係外賣，但套餐組合夠多，由海鮮到肉類，仲有飯同意大利粉，而且兩人餐由$360左右起跳，算來一人不過$180，真心覺得划算。由於一家四口，就分別挑選了龍蝦餐、一人餐及二人餐，各有不同賣點。龍蝦餐（$199）: 紅菜頭菲達芝士香橙沙律先用清新既沙律清清味蕾，紅菜頭令沙律更健康，加上新鮮無花果就更添甜美。 炭燒波士頓龍蝦（半隻）配扁意粉龍蝦汁 其實仲可以改成 Risotto，悉隨專便，但個人覺得意粉更適合配龍蝦，而且給龍蝦汁緊扣的意大利粉，更是人間美味。由於是外賣，返到家中即時轉碟，麵條份量足一個人食，而且仲保持 al dente 口感，相當對辦，龍蝦肉質依然爽彈，絕不將價就貨，但只得半隻，未必夠喉，大可另加$80，可多半隻享用，下次可以考慮。 法式千層酥其他套餐都係 Tiramisu，唯獨是龍蝦餐有千層酥，放上幾粒藍莓，令賣相及味道更佳，吉士醬份量啱啱好，但畢竟放得太耐，部份千層酥變得軟稔，可惜。伯爵茶當然不會預先沖好，反而是送上茶包，也好，在家中沖泡，自然夠熱。一人餐（$197）:前菜選擇最多，有巴馬火腿配蜜瓜、沙律、水牛芝士、意大利菜湯及龍蝦湯，無辦法，一家人基本上都鍾情龍蝦湯，同埋感覺上CP值較高嘛！主菜 炭燒美國肉眼扒配意大利黑醋汁 大概有五六片，就算拎到返屋企，肉質依然嫩滑有嚼口，伴碟有一份薯蓉及沙律菜，真的一絲不苟，其實仲有美國豬扒、燒春雞、煎三文魚、海鮮飯及Risotto，就算多幾個人，都不愁沒選擇。 Tiramisu濕潤甜美、滑溜可口，灑上少許可可粉，增加了一陣香氣，建議食之前放入雪櫃冰凍一陣，口感好得多。二人餐（$353）: 龍蝦湯 x2，亦可選擇意大利菜湯，龍蝦湯質地濃稠，啖啖都是龍蝦的香氣，好味。共有四款選擇煎三文魚、燴牛膝意大利飯、海鮮意大利麵及黑松露蘑菇飯。由於已經點了肉眼扒，想要些少主食，就選了意大利麵及蘑菇飯。 海鮮意大利麵 配料十足，帶子、海蝦及青口都令人滿意，麵條仍有嚼口，合格有餘。 黑松露蘑菇飯 賣相簡單，飯粒處理得極好，拌和黑松露醬味道更豐富，囝囝就最喜歡。 Tiramisu套餐同樣有Tiramisu，當然係兩份上。 四個人的晚餐可以話變化多端，價位更是$200有找，已經有齊餐包、湯/沙律、主菜及甜品，性價比相當不俗，唯一要挑剔係只送附近地區，遠些小都要自己拎，有點英中不足。地址 : 天后英皇道18號如心銅鑼灣海景酒店1樓電話 : 3553 2667味道 : 4 環境 : 4 服務 : 4 衛生 : 5 抵食 : 5 位置 : 5希望各位喜歡這篇文章的朋友，請在我的專頁上剔"LIKE"，當作小小的鼓勵吧!謝謝!http://www.facebook.com/foodiephilip
