之前提過會同大家分享冰島行程，比個總結大家望望，我主要玩首都同南部。 之前提過會同大家分享冰島行程，比個總結大家望望，我主要玩首都同南部。 首先，去冰島無論自駕定報當地團，我都覺得各取所需，無話邊樣特別好特別唔好，我自己就日日都報團，覺得hea得黎又睇到想睇既野，唔錯。另外，冰島的確動靜皆宜，動方面你可以去騎馬、浮潛、行山、爬冰洞熔岩洞、行冰川、玩雪地車等；靜方面你可以選擇行市區、行國家公園、浸溫泉、坐直升機觀光、坐船賞鯨睇海鸚等。所以去冰島前，你一定要諗清楚自己想去做咩，想玩乜，因為每個人都唔同。我就非常推介大家去以下呢個網址做下功課，有中英文，可以透過呢個網租車搵住宿報團，有大量自駕遊PACKAGE同當地團參考，仲可以搵同當地旅遊公司甚至當地人互動，亦有大量當地人既文章教大家係冰島旅遊。我自己都係透過呢度報所有團。當然，你係可以去到當地先報，視乎你想唔想計劃好先！Reykjavik Excursion應該係當地最大既旅行社，但我就一個都無報過，但唔代表佢唔好，只係我唔鐘意人多既團！記住，夏天同冬天都有各自限定既團，例如冬天先有冰洞極光，夏天就去火山睇海鸚等等。自駕遊係可以報團，只要報左自己開車去集合地點同準時到就得！ https://guidetoiceland.is/ 有人問過我環島遊，我今次就無機會去東部同北部，不過應該都係大同小異。Akureyri就係冰島北面既主要城市，都應該係圍繞住佢玩就可以玩到東部北部！如果唔係自駕既朋友就可以考慮係夏天坐環島巴士，不過車程幾長。 另外，要去冰島，都要係歐洲轉機，其中倫敦係比較受歡迎既轉機點，因為香港有直航去，再轉機去大約用17-20個鐘到就去到。不過，我自己因為貪平，又想去多幾個地方，就先買左卡塔爾航空經曼徹撕特入，再由愛丁堡走。去冰島，主要都係坐冰島航空，不過就無野食，但勝在係歐洲多地方揀包行李寄倉，例如我今次揀既曼徹撕特同格拉斯哥，如果大家想係其他歐洲地方飛冰島可以揀呢間；如果想平，可以揀Easyjet / WOW air，但就要比行李費，而且班次唔算密，視乎邊個地方。成套機票，我大約用左$7,700，如果當時我透過Qatar飛丹麥同瑞典，六千幾就有找！ 以下係主要飛冰島既航空公司： 冰島航空：http://www.icelandair.co.uk/ Easyjet：http://www.easyjet.com/en WOW air：wowair.com/ SAS: http://www.flysas.com/en/hk/ 由冰島機場出去首都，大約45分鐘，我係透過Flybus去，如果想送到你去住宿門口，比多少少錢坐Flybus+！來回巴士大約$310，網址: Flybus:https://www.re.is/flybus/ 有唔少人，會由機場先去左Blue Lagoon藍湖溫泉，又或者上機前去，因為由機場去Blue Lagoon只需20分鐘，去完就去市區或上機走人。如果你會去，記住一定要提早買飛啦！ Blue Lagoon: http://www.bluelagoon.com/ 係機場就可以買到冰島上網卡，1GB純上網無打電話服務大約$130。 Siminn: https://www.siminn.is/english/ 我留係冰島大約7日，以下係我每日既行程： Day 1: 3點鐘到達，首都雷克雅未克 Reykjavik觀光 (宿：Guesthouse Aurora at Reykjavik , $520) Day 2: Golden Circle 黃金圈 + Waterfalls 瀑布 + Black sand beach 黑沙灘 + Northern light 極光 (宿：酒店）(3日團包兩晚住兩日早餐$5,480) Day 3: Glacier Lagoon 冰湖 + Ice Cave by Jeep 坐吉普車去冰洞 + Northern light 極光 (宿：酒店） Day 4: 冰湖 Glacier Lagoon + 行山 Hiking to Skaftafell+ 行冰川 Glacier Walking (宿：Gestinn Guesthouse at Reykjavik $1,980 4晚) Day 5: 冰島西部 Snæfellsnes ($980) Day 6: Snorkeling + Lava Tube 浮潛 + 熔岩管道 ($2,200) Day 7: Horse Riding + Blue Lagoon ($1,700, Blue Lagoon Premium Ticket) 以上所有團包接送，另外主要都係每日9-5，所以我每日都有時間係市區行、食野同行街。 機票：約$7,700 住宿:：約$2,500 報團：約$10,400 合共：約$20,600 （不包飲食同購物） 貴唔貴見仁見智，但如果想再平d，未必要揀我玩既tours，因為每個人想做既唔同，例如你唔浮潛唔騎馬，又會慳左3千啦！如果住仲想平D？可以考慮住Hostel ，但基於每日既體力勞動，再加上搵過其實價錢唔差太遠，我就揀左住Guesthouse。我係用 booking.com 搵住宿。 食方面，要平就一定要自己煮，首推去Bonus超市買http://www.bonus.is/ 留意營業時間 整左2-3餐三文治做Lunch用左$70港紙，但當然都要間唔中出去食下先體驗到冰島個種貴，食下熱狗、海鮮同羊架，大約2百至5百一餐包飲品，視乎你食得幾豪食幾多，始終要體驗當地文化，飲食係少不了！ 打到呢度，要講既應該都要講晒，但都係呢句，去冰島，真係睇你想做乜，想自駕定報團？想環島遊？想觀光？想放鬆夠hea？想要刺激挑戰自己？每個人想要既都唔同，所以Budget用幾多，真係個個唔同，但聽講兩萬應該就點都走唔甩！不過一定一定一定值得！ 如果對冰島（或者其他歐洲地方）有任何問題，我非常願意解答！希望大家有機會去冰島，都會玩得樂而忘返，愛上呢個人間天堂，但記住去到要好好守護環境！
