對於酒店自助餐，自小時候開始已種下情誼結 !! 人生第一次跟隨爸媽到酒店品嚐自助餐印象十分深刻 ! 那美輪美奐大堂、現場彈奏鋼琴聲、刺激嗅覺的美食...... 都造就左今日為食既我 ! 嗯......都係講番酒店啦， 相隔多年其裝潢已有很大轉變，最近餐廳推出紫薯下午茶相當矚目，即萌起重遊舊地念頭，誰不知宣傳單張上「龍蝦 • 鮑魚海鮮薈」自助晚餐好似更豐富吸引，咁一於去勁擦海鮮餐啦! FB : https://www.facebook.com/gluttonousmeow/ IG : https://www.instagram.com/gluttonousmeow/ 黎自美國波士頓既龍蝦及日本鮑魚雙雙成為今次主角，有超過15款龍蝦和鮑魚菜式作為主打，海鮮控絕對不能錯過啊 ! 簡約風格與以往氣派有所不同，但對我而言親切感仍然依舊 ! 樓底不算高 ; 勝在食物區域都分得鮮明。 頭盤 - 大概有10多款選擇。 龍蝦青瓜柑橘肉乳酪杯，賣相相當精緻，味道亦清新開胃。 自助沙律區 - 有芒果及奇異果汁作醬料，非常特別 ! 海鮮冷盤- 包括加拿大雪花蟹腳、紐西蘭藍青口、翡翠螺及海蝦等。 當中加拿大雪花蟹腳肉質鮮嫩，美中不足係不夠粗身，未能營造出啖啖肉口感。 生蠔刺身區 - 留意紐西蘭生蠔紐西蘭每次限拿3隻，嗜蠔朋友可能要多走幾轉。 新鮮生蠔重海水味且creamy，值得一試 ! 每晚都有5款新鮮刺身供應，包括三文魚、希靈魚、甜蝦、鯛魚及八爪魚。當中必試係價格較高鯛魚，其餘味道較普通。 熱盤方面，有多款龍蝦及鮑魚菜式可以選擇。 避風塘香辣炒龍蝦鉗 - 避風塘中式烹調相當惹味，鮮甜肉汁加上啖啖龍蝦肉，必試 ! 韓式龍蝦海鮮鍋 - 有龍蝦，大蝦、螃蟹、白蜆、青口、魷魚等，材料相當豐富，配上韓式味噌、泡菜及高湯燜煮，辛辣與海鮮鮮味交替，實屬秋冬暖胃之選 ! 磯燒鮑魚龍蝦酥盒 - 建議最好一口咬下，因為酥盒內的汁料與鮑魚龍蝦肉即時混和，味道匹配 ! 唯酥皮未夠鬆化。 鮑魚煙肉洋蔥焗生蠔 - 適合不愛吃生蠔朋友。 紫薯藜麥鮑魚雞粥 - 又一必食推介! 食粥另一個層次就係可以肆意落喜歡配料，卜卜脆既扭麻花同蔥花係絕對不可錯過! 日式紫薯芝士焗田螺伴鮑魚 - 即場焗製，紫薯蓉代替薯蓉感覺頗新穎，唯紫薯蓉較乾。 另設幾款咖喱美食，配以薄餅慢慢享用。 鐵板燒區 - 即叫即燒雞翼、德國豬肉腸和雜錦串燒等。 當中梗係唔少得重點推介既海鹽黑松露燒龍蝦，絕對令人食指大動 ! 每位客人都會免費送一份。 海底椰花膠鮑魚螺頭燉雞湯 - 非常滋補養生，但味道較淡。 麵包爐可不時烘熱麵包，另有輕量低脂牛油選擇，非常貼心 ! 師傅即場將整份燒紐西蘭肉眼扒及燒羊架切件，保持原汁原味 ! 肉眼扒味道不錯，但肉質有少計韌。 絕對要試這片皮鴨 ! 師傅切下去既時侯清楚聽到「卜卜」清脆聲音，個皮食落真係好脆 ! 再夾著肝醬麵包一併食，真係大大滿足 ! 黎到最愛既甜品區 - 真係好多有款式同口味呀! 單係蛋糕就已經有10多款選擇，令人目不暇給 ! 一口蛋糕也不錯，可以試更多口味，罪惡感無咁重 XD ! 點擊圖片放大 朱古力噴泉當然少不了，小朋友都會喜歡的! 紫薯甜品重頭戲 - 即焗紫薯藜麥梳乎厘，清楚見到面層鋪滿粒粒紫薯，十分吸引 ! 必試 ! 紫薯藜麥奶凍 - 用北海道3.6牛奶製成，奶凍好滑並帶有濃厚紫薯及奶味，面層有粒粒藜麥甚有咬口，最驚喜係底層竟然有紫薯蓉，食落變得好有層次，必定要試 !! 紫薯藜麥木糠布甸 - 又一必試之選！淡淡紫薯味加上木糠布甸，配搭一流! 師傳即燒藍莓法式燉蛋，加上陣陣焦糖香味，絕對係視覺與嗅覺雙重享受 ! 原來好戲在後頭，火焰藍莓法式燉蛋才是真身 !! 黎自瑞士 MOVENPICK 雪糕出名軟綿幼滑，仲有10幾款口味，當然趁機試多幾款 ! 雪糕可拼即製窩夫及七彩繽紛既配料，仲好好玩啊！ 仲有Dreyer's 同雀巢雪糕，對自助餐來說，款式口味眾多，值得一讚 ! 自助飲品區 — 咖啡、茶、橙汁、汽水及啤酒都係無限供應。 不得不提，每位客人都可獲贈 海鹽黑松露燒龍蝦 及 日式磯燒鮑魚 各一份。而兩款都是必食之選！！前者龍蝦肉烤得甘香而且能保存肉汁，啖啖都彈牙味美；而後者入口咬開時黏牙有「趙」口，令人回味無窮，必試！ 紫薯藜麥鮑魚雞粥，驟眼看似糖水，有粒粒紫薯、藜麥及鮑魚雞絲 ; 粥底軟綿且入味，食落有淡淡紫薯味道，好味又養生 ! 一定要食 ! 火焰藍莓法式燉蛋，焦糖混入酒香，燉蛋亦超級幼滑，推介之一！ 即焗紫薯藜麥梳乎厘，面層焗得香脆而且鋪滿粒粒紫薯，食落陣陣紫薯加上蛋香，好想再食多個呀！ 精緻甜點不單止好味，影相呃 LIKE 亦一流 ! 令人怦然心動 MOVENPICK 雪糕窩夫，單睇賣相已嬴到不少掌聲 (賣花讚花......) !! 但其實味道都十分出色，窩夫好脆口再配上雪糕一齊食真係停唔到口呀 !! 總括而言，主打既龍蝦及鮑魚都非常出色，而當中紫薯食品更驚喜處處 ! 以折實3百多價錢來說實在值得一試! ************************************************************************************ 餐廳最近有7折優惠，有興趣可按此 ---> 領取優惠，下載或分享現金券! ************************************************************************************ 星期一至四 : 成人$438 │ 小童 $288 星期五至日、公眾假期及其前夕 : 成人$468 │ 小童 $298 供應期由現在至 2017年1月4日│時間 6:30pm 至 9:30pm│4-11歲小童和65歲或以上長者可享65折優惠│另設原價加一服務費│ 記住要預先訂座呀! 香港百樂酒店 Park café 地址：尖沙咀漆咸道南61-65號4樓 (地圖) 訂座電話 : 2731 2168、6588 0682 ( WhatsApp) _____________________________________________________________________________ 記住 LIKE【為食貓呼嚕嘆世界】Facebook 同 Instagram，一齊染上「為食」癮 !_____________________________________________________________________________ Copyright © 2016 為食貓呼嚕嘆世界. All rights reserved. | 版權所有，歡迎轉載並請列明出處，謝謝!
