日本築地有好多玉子燒店鋪，但賣既都只限原味! 路經荃灣又諗起附近有間專賣玉子燒店鋪，即刻去試下先! Facebook : https://www.facebook.com/gluttonousmeow/ 原來都有好多口味選擇，仲好有創意! 咸味有4款而甜味有3款，仲有冷熱之分...... 但一次過又試唔晒咁多(T_T), 最後點左熱既甜味「紫薯玉子燒」同埋咸味「紫菜明太子玉子燒」。 店裡有3位店員，1位落單兼任包裝，2位負責煮玉子燒。眼見現場都有大概10人等侯，落單兼任包裝店員都應接不暇，叫我地預大概20分鐘左右，憑單取玉子。雖然比較耐，但即叫即整既都值得等既! 原來佢地會將煎好的蛋放一旁，到客人取貨時候即時於盒內放入煙燻，然後用貼紙封好，店員叮囑要煙燻3分鐘後先開蓋。 好漫長既3分鐘呀...... 一開蓋已經聞到好香既煙燻味，單睇外型都流晒口水! 甜味「紫薯玉子燒」- 熱食 紫薯蓉其實唔太甜，反而蛋味好濃。蛋味加上甜味都幾夾，不過似乎紫薯味被蛋味蓋過，唔夠突出。蛋身比較硬，有少許煮耐左既感覺。 咸味「紫菜明太子玉子燒」- 熱食 第一啖食落口先知原來蛋同紫菜明太子係咁夾既，絕無喧賓奪主! 蛋身無咁硬再加上一粒粒明太子食落好有層次! 唯一美中不足既係太少明太子啦! 玉子燒價錢都比較貴，大概要30多元，不過值得一試既! 為食貓話好似隱約聞到陣蛋味喎.......(思覺失調中...) 煙燻玉子燒 地址：荃灣鱟地坊80-84號華成樓B座地下B3號舖(地圖) _______________________________________________________________________________ 記住 LIKE【為食貓呼嚕嘆世界】Facebook，一齊染上「為食」癮 ! ________________________________________________________________________________ Copyright © 2016 為食貓呼嚕嘆世界. All rights reserved. | 版權所有，歡迎轉載並請列明出處，謝謝!
