今日約咗兩個朋友食lunch，佢哋好好，專登就我入嚟屯門搵食。我哋揀咗位於御海灣嘅Sogno Café x 雞翼山，佢哋lunch係任飲任食menu。最初對於任飲任食嘅餐廳唔敢有太大期望，但最後竟然好有驚喜，食物同埋飲品嘅質素都好高！🏆 明太子卡邦尼扁意粉🍝成日覺得好食嘅卡邦尼意粉好難搵，但哩度嘅質素唔止合格，仲可以話係優異。意粉煮嘅時間控制得啱啱好，做到al dente嘅口感，醬汁加入溫泉蛋汁質感更滑，味道更香。中間加入蘑菇同煙肉片口感同味道更添層次。 🥇 他他醬蝦多士 🦐🍞一口蝦多士，細細粒，唔會漏。蝦多士炸到好鬆脆，蝦肉彈牙，加上香濃他他醬，真係停唔到口，我哋都encore咗幾round。 🥈 Sogno全日早餐真材實料，絕無欺場。炒蛋嫩滑，牛油🧈味香。特別鍾意佢加入烤菠蘿🍍，香甜開胃。蘑菇粒都好香好新鮮。 🥉 麻薯窩夫🧇配雪糕賣相吸引，味道可口。窩夫加入麻薯真係叫人難以抗拒，口感煙靭Q彈，加埋朱古力雪糕同蜜糖一齊食真係人生一大享受。 飲品我試咗凍mocha同牛油果🥑芝士奶蓋沙冰，兩杯都好高質。mocha味道好濃郁，咖啡同朱古力味都好香，兩者相輔相成，咖啡無酸味，我鍾意❤️。牛油果芝士奶蓋沙冰都好好飲，沙冰加入芝士奶蓋口感好細滑，味道香甜，中間散發住陣陣嘅牛油果味，正！ 真心高質，CP值高，埋單每人$178！📍Sogno Cafe x 雞翼山 (屯門)屯門海皇路23號御海灣地下19號舖
